Kena 24 Ogos 2021, Saksi-Saksi Jehovah menang ba siti kes ti berat ba Ecuador. Kot ti Netapka Undang-Undang ti Pemadu Tinggi mutuska hak Saksi-Saksi Jehovah ngereja pengawa sembah sida udah dikachau komuniti orang asli ba San Juan de Ilumán ba Begian Imbabura. Pemutus kot nya nulung ngelindung hak semua orang ba serata Ecuador dalam pengawa sembah, kelebih agi sida ke diau ba endur komuniti orang asli. Lalu tu pemutus ti penting ke ulih dikena ba menua bukai.

Ba taun 2014, bala tuai komuniti nyerebu tanah ke enggi Saksi-Saksi Jehovah kena ngetuka pengawa nirika Palan Gempuru. Sida mega nagang bala menyadi kitai ari pengawa begempuru sereta pengawa nginjil ari rumah ke rumah. Bala menyadi kitai mai kes nya ngagai kot. Taja pia, dua iku akim ba endur nya enda setuju hak Saksi-Saksi Jehovah dikachau.

Pengudah bala menyadi enggau naka ulih ngemutarka penanggul nya nengah kot ba endur nya, sida lalu mai kes nya ngagai Kot ti Netapka Undang-Undang ti Pemadu Tinggi ba menua nya. Kot ke besai tu madahka kot ba endur nya tadi udah ngachau hak Saksi-Saksi Jehovah ngereja pengawa sembah sida. Bala tuai komuniti enggau bala akim nya diasuh enggau kursus chara nerima pengarap enggau adat orang bukai. Nambahka nya, bala tuai komuniti dipinta nulung “orang ari semua pengarap enggau adat diau bebaik enggau pangan diri, lalu kelebih agi ngelindung pengawa” Saksi-Saksi Jehovah.

Philip Brumley, tuai luyar Saksi-Saksi Jehovah, madahka: “Kami nemu undang-undang pasal hak orang asli ngelindung adat orang asli. Tang undang-undang nya enda patut salah dikena enggau chara ti ngachau hak orang bukai.”

Saksi-Saksi Jehovah ba San Juan de Ilumán amat beterima kasihka pemutus kot besai nya.

Kitai gaga ati meda bukti jari Jehovah lebuh bala menyadi kitai bulih penguntung ari pemutus kot ke ngelindung pengawa sembah kitai.—Jaku Dalam 21:1.