Kabut Harold, ke dikumbai ribut kategori 5, nuntung begian utara Vanuatu kena 5 April, 2020, lalu mai mayuh pengerusak. Kabut nya lalu mansang nuju ke tenggara, lalu mangka begian barat daya Fiji kena 8 April, lalu nya ngujungka pengerusak nyadi dia. Nitihka riput keterubah, nadai seiku pan ari bala menyadi kitai dia bebadi tauka bakal.

Bisi 280 iku penginjil ke diau ba Espiritu Santo iya nya pulau ti pemadu besai sereta ba begian utara di Vanuatu. Mayuh bengunan sereta umai balat dirusak ba pulau nya, pia mega enggau pulau ke bukai ti semak. Di Fiji, rumah ke enggi kira-kira 260 iku penginjil pan balat dirusak. Pia mega, sida enda senang bulih ai, karan sereta pemakai.

Pampang Opis Fiji benung ngatur pengawa nyadung utai ke diguna kena meri bantu. Bala tuai gempuru pan datai ngabas sereta meransang bala menyadi ke ditinggang penusah tu. Kitai semua gaga ati laban bala menyadi kitai dia nerima utai ke diguna sida ninting hari lalu pia mega bulih pengelantang ari Bup Kudus.—Jaku Dalam 17:17.