80 taun suba, Minos Kokkinakis dianjung ke siti pulau Gerika ba Tasik Aegean ke dikumbai Amorgós. Dia, Menyadi Kokkinakis diukum jil lalu patut diau dia sepengelama 13 bulan. Ba maya nya, menua Gerika ngembuan siti undang-undang baru ke madahka, orang enda ulih nginjil tauka ngasuh orang bukai nukar pengarap. Siti kot madahka, Menyadi Kokkinakis udah ngelanggar undang-undang nya, lalu meri ukum jil ngagai iya, tang nadai dipechara. Undang-undang nya digaga lebuh menua Gerika dipegai seiku pemerintah ti kering ke seruran nekan rayat. Pemerintah nya benama Ioannis Metaxas. Menyadi Kokkinakis seiku ari Saksi-Saksi Jehovah ti keterubah ditangkap ketegal ngelanggar undang-undang nya. Tang ari taun 1938 ngagai 1992, bisi 19,147 iku bala menyadi Kristian kitai ke udah ditangkap. Sekumbang maya nya, beratus iku menyadi Kristian kitai ari menua Gerika udah natka pemerinsa ti nyengkaum balat dipalu, ditangkap sereta diukum jil ketegal deka nusui berita manah ari Bup Kudus.

Lebuh Menyadi Kokkinakis beumur kira-kira 30 taun, iya berengkah ngelaban perintah menua Gerika ba kot ngambika tau bulih hak enggau pengelepas kena nusui utai ke dikearapka iya ngagai orang bukai. Pengawa tu ngena 50 taun ari pengidup iya. Iya ditangkap lebih ari 60 kali lalu udah diukum jil lebih ari 6 taun enda ngira ba jil tauka ba pulau-pulau ke dikena nyadika jil. Menyadi Kokkinakis sama enggau menyadi Kristian kitai ti bukai ditangkap lalu diperinsa ba endur sida ke dijil. Lalu, lebuh umur Menyadi Kokkinakis 77 taun, iya ditangkap kali ke penudi. Iya madahka ngagai kot, pengawa nangkap iya nya, salah lalu enda lurus. Taja pia, kot nya enggai nerima utai ke dipadahka iya, lalu ngukum iya. Tu ngujungka Menyadi Kokkinakis ngapil kes nya ngagai kot bukai ke bisi kuasa ti besai agi nyentukka Kot Besai ba menua Gerika. Tang Kot Besai nya mega ngaga pemutus ngukum iya. Pengudah semua tu, Menyadi Kokkinakis nganjung kes iya ngagai European Court of Human Rights (ECHR) lalu madahka, menua Gerika udah ngelanggar hak iya kena bejalaika pengarap diri. Ba taun 1993, lebuh Menyadi Minos Kokkinakis beumur 84 taun, nya baru iya menang kes iya ke ngelaban perintah menua Gerika. Iya bulih hak enggau pengelepas kena nginjil sereta bejalaika pengarap diri. Tu kali keterubah ECHR madahka siti menua nya besalah ketegal enggai ngemendarka rayat menua bejalaika pengarap sida enggau bibas. a Taun 2018 nandaka 25 taun pengudah pemutus ti chukup besai nya ari ECHR. Seiku pengajar undang-undang madahka, lebuh orang ke pakar undang-undang baka luyar, hakim sereta bala pemerita, bejuraika kes ke bisi kaul enggau hak bibas bejalaika pengarap, sida suah ngena chunto ari kes Kokkinakis enggau pemutus ECHR ke bekaul enggau kes nya.

Pemutus kes Kokkinakis nyadi siti atur tauka chunto kena ngakim kes ke sebaka enggau iya. Pemutus tu agi beguna indah diatu, laban perintah menua ti bekuasa baka Rusia benung nguji nagang bala menyadi Kristian kitai ari bejalaika pengawa pengarap sida enggau bibas.

Penetap ati enggau pengeran Menyadi Kokkinakis ngereja pengawa nginjil nyadi siti teladan ti chukup manah ngagai bala menyadi Kristian kitai ke benung napi penanggul ba pengawa nginjil. Ketegal Menyadi Kokkinakis tetap ati, iya bulih pemutus ti manah ke agi nulung bala menyadi Kristian kitai kemayaharitu.—Rome 1:8.