Kena bulan Mei 2019, bala menyadi ba Guatemala bulih pemendar betemu enggau bala polis sereta bala bomba. Ba dia, bala menyadi kitai ke lelaki madahka pasal prinsip ari Bup Kudus. Pengawa tu diatur ba Coatepeque, Colomba Costa Cuca, Malacatán, enggau San Rafael Petzal. Ke diatu, bisi 450 iku bala polis sereta bala bomba ningaka ajar ari Bup Kudus tu.

Seiku ari tuai gempuru ke enggau pengawa tu iya nya, Juan Carlos Rodas. Iya madahka, “Ba Guatemala, Saksi Jehovah udah ngajar Bup Kudus ngagai orang jil, ba tiga buah rumah jil. Tu udah digaga lebih ari 15 taun ti udah. Nitihka ku orang ke gawa ba jil, orang jil ke belajarka Bup Kudus berubah manah agi. Nya alai, orang ke gawa ba jil nya ngasuh kitai ngajar Bup Kudus ngagai bala polis sereta bala bomba.”

Nitihka iring ari pampang opis Amerika Tengah, pengawa tu ulih digaga dua kali seminggu pengelama 15 minit. Utai ke dikunsi sida nya: chara ngembuan kaul ti manah enggau orang bukai, chara ngena kuasa enggau betul, sereta kerejasama dalam tim. Bala menyadi kitai mega meri litaricha ti ngena, masang video ari laman web, sereta ngayanka chara ngiga penerang ari aplikasi JW Library.

Saksi-Saksi Jehovah amat beterima kasihka peluang ngajar Bup Kudus ngagai bala polis sereta bala bomba. Arapka semua sida ulih belajar mayuh agi ari Bup Kudus, sereta bulih penguntung.—2 Timoti 3:16.