Bisi 11 buah Opis Penyalin (RTO) ba India, alai sida nyalin litaricha kitai dalam 36 bengkah bansa jaku. Diatu, sida napi pemar ti baru ketegal penyakit berampit. Enggau saup ari Jehovah, sida ulih mutarka penanggul nya lalu neruska pengawa sida.

Ngambika ulih nyalin litaricha kitai, bala penyalin patut begulai dalam siti tim ngambika bekerejasama lalu ngasilka salin ti manah. Tang, seraya penyakit COVID-19 ngelekai, mayuh orang ba India patut bekurung, lalu tu nagang bala penyalin ari betemu enggau pangan diri. Pia mega, sida ke gawa ba begian ngerikut audio pan enda ulih bejalaika pengawa sida ba dalam RTO.

Ari ke gawa begulai betungga mua ba RTO, bala penyalin berengkah ngena chara video call kena bejalaika pengawa sida sereta ngerikut audio. Indah, chara ti baru tu nejuka sida minta tulung ari bala menyadi ba menua bukai, baka Bangladesh enggau Amerika Serikat.

Pia mega, sida ke ngaga video dalam bansa jaku bengal bisu pan ngiga chara ti baru ngerikut video nya taja pan enda begulai ba endur ti sama. Sekeda ari sida ngagaka bilik tinduk sida empu nyadika studio. Ari ke ngena perengkah ke suah dikena sida ba RTO, sida patut ngena utai bukai. Ngambika chunto, ari ke ngena kamera ti spesial, sida ngena kamera ba talipun binching sida, lalu ari ke ngenkahka kamera nya ba tripod, sida nudukka talipun nya ba kutak aja.

Kelimpah ari semua chara ti baru tu, bala penyalin ba RTO bepanggai ba Jehovah kena nulung sida mengkang bagas sereta ngembuan runding ti positif ba maya ti tusah tu. Peratika sekeda jaku ke kala disebut sida:

Menyadi Lelaki Jose Francis ari Kolkata madah, “Lebuh penusah ninggang, mensia deka beratika penanggul nya, tang Jehovah deka meda chara mutarka iya.”

Menyadi Indu Bindu Rani Chandan ari Bangalore madah, “Taja pan bisi penanggul, aku balat amat gaga ati, laban Jehovah deka ngena aku ngereja pengawa ke Iya, indah ba maya ti tusah tu.”

Menyadi Indu Rubina Patel ari Vadodara madahka asai ati iya: “Nadai utai ulih nekul Jehovah enggau geremung Iya, indah coronavirus deh pan enda ulih nekul Iya!”

Kitai temegahka bala menyadi kitai ke bebendar bekereja ba pengawa nyalin. Kitai endang nemu roh kudus Jehovah ti bekuasa nya ke ngemujurka pengawa sida. Roh kudus Iya pan deka nentuka jaku Jesus dikeamatka, lebuh iya madah: ‘Lalu Berita Manah pasal Perintah Petara deka ditusui di serata dunya, nyadika saksi ngagai semua bansa.”—Matthew 24:14.