Kena 25 Oktober 2019, Menyadi Ashok Patel, seiku ari Raban ti Ngiring Pampang Opis India, dipinta ngeluarka Bup Kudus Salin Dunya Baru dalam bansa jaku Telugu ba konvensyen pelilih menua. Konvenyen tu dipejalaika ba Konvensyen Entarabansa di Hyderabad, India.

Bansa jaku Telugu nya bansa jaku ketiga ti pemadu besai dikena ba India, kelimpah ari bansa jaku Hindi sereta Bengali. Bansa jaku tu dikena dalam urung 91.9 iku orang. Nyentukka diatu, dalam urung 6,000 iku penginjil ke gawa ba bansa jaku Telugu. Tang semua orang ke datai ngagai konvensyen tu bisi 8,868 iku. Tu nunjukka bisi mayuh pengawa nginjil ti patut dikereja ba bansa jaku nya. Taun tu aja, bisi dua iti pelilih udah ditumbuhka.

Nyalin Bup Kudus dalam bansa jaku Telugu begunaka lima taun. Nitihka seiku penyalin projek tu, bala nembiak tusah deka meretika jaku Telugu ba Bup Kudus ke bukai, laban jaku ke dikena sida kelalu lama. Iya madahka, “Kitai ulih nyimpulka, nengah salin Bup Kudus tu, Jehovah baka ke benung bejaku ngagai bala nembiak ngena jaku ti senang, terang, sereta jaku kemayaharitu.” Penyalin ke bukai mega madahka, “Lebuh kami macha ayat Bup Kudus salin baru tu maya nginjil, orang ke ninga lalu nemu reti ku ayat nya.”

Mayuh ari Bup Kudus bansa jaku Telugu nadai madahka nama Petara Jehovah. Tang, Salin Dunya Baru bisi nyalin nya, nyentukka orang ke macha pan udah nemu sapa Penempa sida ti Pemadu Bekuasa. Nambahka nya, bisi sekeda leka jaku pasal nyawa sereta semengat nya nyau bechampur enggau ajar Hindu. Tang ba Salin Dunya Baru, orang ulih terus meretika leka jaku nya ti bendar.

Seiku penginjil madah, “Asai aku, orang ke macha Bup Kudus Baru tu deka ngasaika diri dikesayauka Petara lebih agi ari ke suba.” Tu nunjukka, orang ke macha Bup Kudus baru tu ulih ‘ngasaika pemadas Jehovah.’—Masmur 34:8.