Dalam urung 100 buah rumah bala menyadi ba Jakarta Indonesia, kena ampuh bah. Indah, bisi sekeda ari rumah nya tenggelam enggau penalam 1.5 meter (5 kaki) dalam ai. Ampuh bah tu nyadi ketegal ujan lebat ke nyadi kena 31 Disember 2019. Leka ujan ke nurun mega amat lebat.

Nadai riput ti madahka bala menyadi kitai bakal tauka bebadi ketegal penusah tu. Sekeda ari sida ulih dipindahka ngagai endur ti likun agi, tang bisi mega sekeda enda ulih ninggalka rumah sida, lalu patut ngiga endur belindung ba rumah sida empu. Nambahka nya, beberapa iti endur kitai begempuru mega rusak mimit ketegal ampuh bah tu. Bala tuai gempuru ba menua nya, ngaga atur nyediaka bantu ti patut baka pemakai sereta ai. Bala tuai ti ngabas mega datai meransang. Bisi dua iti Komiti Tulung Pengerusak Alam ditumbuhka, lalu terus ngemataka utai ti diguna bala menyadi kitai ke kena penusah tu.

Taja pan kena ampuh bah, bala menyadi kitai tetap ngereja pengawa ti negapka pengarap sida baka selama. Nyentukka bisi siti ruang bilik, sanggup nunjah ampuh bah nya ketegal deka datai begempuru. Menyadi Daniel Purnomo, seiku ari Komiti Pampang Opis Indonesia madahka, “Tu meh ampuh bah ti pemadu balat ke kala nyadi dalam beberapa taun tu. Tang, nya enda ngelemika bala menyadi kitai. Sida terus nunjukka pengerindu sida ngagai bala menyadi, sereta betulung pangan diri.”

Kitai amat enda sabar deka nganti semua penusah ke baka tu, nadai agi.—Mark 4:39.