Ba 4 April 2021, Ribut Seroja ngujungka mayuh pengerusak nyadi ba Indonesia. Pengawa meri bantu mai penguntung, ukai semina nyeruri rumah bala menyadi, tang pengerindu bala menyadi dikeringka sereta mai puji ngagai Jehovah.

Menyadi Ela Ludjipau nya indai tunggal. Rumah iya dirusak ketegal pengerusak alam lalu udah diaduka baru sida Komiti Tulung Pengerusak Alam (DRC.) Ku iya, “Taja pan aku diau kediri enggau bala anak, tang aku enda kala asai kediri ketegal sukung ke diayanka bala menyadi.” Seiku da menyadi Yuliana Baunsele madahka, “Lebuh aku meda bala menyadi datai enggau lengkas sepengudah pengerusak alam, aku andal agi ke Jehovah amat ibuhka aku.”

Menyadi Dicky Thome, ke seiku ari raban DRC madahka: “Amat ngagaka ati lebuh meda chara Jehovah nulung bala menyadi ke begunaka tulung. Kami amat diperansang lebuh meda bala menyadi ke beterima kasih ke bantu ke diberi. Pengarap kami dikeringka agi lebuh meda pengandal sida ke Jehovah ke deka ngelindung sereta nyaga sida.”

Ukai semina bala menyadi ke ngasaika pengerindu nya. Menyadi Marsel Banunaek enggau diri sebilik iya ke diau ba endur ke bepechah-belah. Orang ke berimbai pendiau nyakal Saksi-Saksi Jehovah. Taja pia, lebuh sida meda bala menyadi ke datai ari bansa bukai meri bantu ke sida sebilik, sekeda ari sida madahka: “Saksi-Saksi Jehovah amat bebida ari utai ke dipadahka orang bukai ngagai kami.” Menyadi Marsel madahka, “Orang ke berimbai pendiau amat alit ati lebuh meda pengerindu enggau penyerakup bala menyadi. Pia mega, bala kaban belayan kami ke meda pemanah bala menyadi. Diatu sida berengkah nanya pengarap kami. Kami amat gaga ati ke pengerindu bala menyadi.”

Seiku ari pegawai nengeri Yosi Duli Ottu madahka sida ari raban DRC nya “teladan ti manah” laban pengawa sida ti teratur sereta bejimat ngasika semua pesan kena nyaga diri ari COVID-19. Iya madahka ngagai sida: “Aku amat alit ati lebuh meda utai ke udah digaga ngagai kaban kita. Kita enggau lengkas meri tulung ngagai sida ke dituntung penusah. Kita amat teratur lebuh meri bantu lalu kita disikap enggau manah.”

Pengerusak alam ulih ngerusak utai ke dikemisi kitai tang enda ulih ngerusak pengerindu Kristian sereta penyerakup kitai. Amat ngagaka ati lebuh meda “pemadas pengawa” bala menyadi ngeringka pengerindu ke pangan diri sereta meransang orang bukai “ngemuliaka” Jehovah!—Matthew 5:16.