Kena 28 November 2020, Bup Kudus Salin Dunya Baru ke udah disalin penuh, dikeluarka dalam empat bansa jaku ke dikena orang asal menua Indonesia, iya nya jaku Batak Karo, jaku Batak Toba, jaku Jawa enggau jaku Nias. Semua salin Bup Kudus tu dikeluarka dalam fail bansa elektronik sereta dichelak. Menyadi Geoffrey Jackson, seiku ari Raban ti Ngiring, ngeluarka semua salin Bup Kudus tu dalam siti cheramah ke dirikut iya dulu, lalu cheramah nya dipandangka terus ngagai semua eklisia di semua pulau menua Indonesia. Kira-kira 41,265 iku orang ningaka program nya. Pia mega, Menyadi Geoffrey pan madahka jaku gerah pasal Bup Kudus Salin Dunya Baru Jaku Gerika deka dikeluarka enda lama da agi dalam bansa jaku Sunda.

Tu meh asil ari pemagas bala penyalin ke gawa ba projek tu dalam lebih ari tiga taun setengah. Bisi lebih ari 100 juta iku orang ke ngena siti ari empat iti bansa jaku tu. Kelimpah ari nya, empat iti bansa jaku tu dikena lebih ari 2,600 iku penginjil maya begempuru sereta lebuh nginjil enggau ngajar.

Salin Bup Kudus ke bukai ti dikena sebedau tu, suah ngena leka jaku tauka chara sepil ti lama, ke enda ditemu pemayuh orang kemayaharitu. Seiku ari penyalin madahka: “Bup Kudus Salin Dunya Baru ti penuh tu nyadika bukti pasal Jehovah ke dekaka semua orang ningaka jaku Iya dalam bansa jaku ti mudah dimeretika sida sereta negu ati sida.”

Daniel Purnomo, seiku ari Komiti Pampang Opis Indonedia nerangka: “Kitai napi mayuh penusah diatu, kelebih agi ketegal pengelekai COVID-19. Bala menyadi kitai ke ngena empat iti bansa jaku tu amat beterima kasih laban nerima pemeri tu ba maya ti ngena.”

Kitai gaga ati laban Jehovah udah meri pemeri tu ngambika mayuh agi orang ulih meretika jaku Iya dalam Bup Kudus. Kitai arapka mayuh agi orang ke ngena bansa jaku asal tu deka bulih penguntung ari ajar Bup Kudus.—James 1:17.