“Raban ti Ngiring bisi pemeri ti amat spesial ke semua kita.” Nya meh utai ke disebut Menyadi Geoffrey Jackson, seiku ari Raban ti Ngiring, maya iya ngeluarka sebagi Bup Kudus Salin Dunya Baru dalam bansa jaku ke dikena mayuh orang kemayaharitu. Pengawa ti spesial tu diatur kena 11 Januari 2020, ba Romema Arena Israel. Penyampau orang ke datai bisi 2,125 iku orang.

Menyadi David Simozrag, ke gawa ba Begian Penerang ke Orang Mayuh di pampang opis Israel madahka, “Dijangka, lebih ari lapan juta iku orang ngena bansa jaku Hebrew ba endur kami. Kami pechaya, Tanakh a nya bansa jaku kemayaharitu, lalu amat beguna ke semua sida.” Sebedau tu, semina mimit aja salin bansa jaku Tanakh ke disalin.

Bup Kudus Salin Dunya Baru ke penuh tauka sebagi aja, udah bisi dalam 186 iti bansa jaku. Bala menyadi ke nyalin Bup Kudus tu, udah bebendar gawa. Sida deka nentuka ajar nya betul, baka penyalin Bup Kudus Hebrew kelia suba. Pengawa nyalin tu begunaka lebih ari tiga taun. Seiku ari penyalin madah, “Bisi beberapa ayat Hebrew dalam Bup Kudus tusah ditemu mayuh orang. Nya alai, sida patut ngiga penerang tauka salin ari bansa jaku ke bukai. Tang, ketegal udah bisi salin tu, sida ulih meretika agi reti ayat dalam Bup Kudus.”

Seiku menyadi lelaki mega madah, “Pengelama betaun-taun, mayuh ari orang ke macha sebagi ari bansa jaku Tanakh enda meretika ayat nya. Tang diatu, sida ulih meretika nya enggau terang sereta bulih penemu ti betul.” Diatu, lebih ari 2,000 iku penginjil ba begian Israel, lalu 603 iku ari sida nya ngena bansa jaku Hebrew. Sida tentu deka ngena pemeri ti spesial tu, ‘belajarka adat Jehovah dalam pengidup.’—Esra 7:10.