Itali nya siti ari menua ti pemadu balat ditinggang penyakit COVID-19. Baka ke diasuh Raban ti Ngiring, Pampang Opis Itali nyediaka utai ti diguna bala menyadi kitai ba dia, sereta meri jaku peransang ari Bup Kudus.

Tiga iti Komiti Tulung Pengerusak Alam ke udah ditumbuhka benung meri tulung ngagai menyadi kitai di Itali utara, tengah sereta selatan. Bala tuai gempuru meri riput ngagai tuai ti ngabas pasal nama utai ti diguna bala penginjil ba eklisia sida. Tuai ti ngabas nya lalu meri penerang ngagai Komiti Tulung Pengerusak Alam.

Kelimpah ari meri bantu ba utai ti diguna sehari-hari, bala tuai gempuru mega nulung bala menyadi terus begempuru sereta nginjil. Menyadi Villiam Boselli, seiku tuai ti ngabas ke ngemataka siti pelilih semak nengeri Milan madahka, “Taja pan sida diasuh diau ba rumah diri aja, tang semua bala menyadi mengkang rapat enggau pangan diri. Lalu ketegal sida begempuru nengah video call sida ulih meransang pangan diri sereta meri komen. Indah bala menyadi ke tuai pan bulih penguntung ari gempuru nengah video call. Asai aku, diatu semua eklisia kitai beserakup agi ari ke suba!”

Pia mega, mayuh kaban belayan ke ukai Saksi Jehovah, diatu meda gempuru kitai begulai enggau diri sebilik ke udah nyadi Saksi. Seiku menyadi indu madah: “Laki aku nadai kala deka datai gempuru, tang diatu, iya ulih meda gempuru ba rumah iya empu. Lalu iya amat rindu enggau gempuru!”

Bala menyadi kitai deka ngambi tiap iti peluang kena nginjil. Ngambika chunto, seiku menyadi indu deka ngangkutka siti kerusi roda ngagai rumah menyadi indu ti tuai. Lebuh iya benung deriba nuju kin, iya diketuka tiga iku polis. Menyadi indu nya nerangka pasal iya deka meri bantu ngagai seiku orang tuai, lalu iya nunjukka sida surat ti ngemendarka iya bejalai. Iya lalu meri tiap iku polis nya surat mit Nama Deka Nyadi Jemah Ila? enggau Amat Pemerinsa Deka Nadai Agi? Sida bala polis nerima surat ke diberi iya. Lebuh menyadi indu nya pulai baru pengudah nganjung kerusi roda nya, sida bala polis ngetuka iya baru. Tang kali tu, sida ngetuka iya ngambika meri terima kasih, sereta minta iya nerang agi pasal pengadang ari Bup Kudus. Sida indah mai dua iku polis bukai sama enggau berandau. Menyadi indu kitai gaga ati nunjukka sida jw.org. Seiku polis madahka iya, “Terima kasih, nuan amat ngagaka ati kami saritu!”

Menyadi Boselli madah: “Taja pan aku ke betanggungjawapka meransang sereta merindang orang bukai, tang aku meh ke diperansang sida, lebuh aku meda sida mengkang kering ba pengarap lalu nyembah Jehovah. Asai ka nyabak ngenang baru pasal pengerindu sida ngagai Jehovah ti bendar sereta kering. Sida endang baka pemeri ari Jehovah ti amat beguna ba kami!”

Endang nyata, taja pan benung napi pemar enggau penusah, bala menyadi kitai mengkang kering ba pengarap sereta enda ‘beguyat lebuh kena perinsa.’—1 Tesalonika 3:2, 3.