Pampang opis Itali pindah ari Rome ngagai bandar besai Bologna enggau Imola. Takah Bologna nya 370 kilometer mua ke utara Rome, lalu Imola 48 kilometer ari Bologna. Pengawa ngaduka bengunan semilan tingkat, ke deka digaga nyadi begian opis udah berengkah ba Bologna. Kena taun 2018, bengunan bukai ke empai lama udah diaduka udah ulih dikena lebih ari 60 iku bala sukarela ba Betel, iya nya begian penyalin sereta begian sukung ke bukai.

Ba Bologna, siti bengunan benung didirika endur ruang bilik Betel deka dipindahka. Bengunan tu ngembuan tujuh tingkat, nyengkaum tiga begian baruh tanah endur parking kerita. Penyauh endur tu, dalam urung satu setengah kilometer ari bengunan pampang opis. Nambahka nya, bisi rumah bukai deka didirika ba endur nya.

Kena taun 1948, Saksi-Saksi Jehovah meli hartanah ba Rome, lalu mindahka pampang opis sida ari Milan kia. Tu meh hartanah keterubah ke enggi sida empu. Kenyau ari nya mega, mayuh pemansang ba Itali. Sebedau taun 1950, penyampau bala penginjil ba menua nya enda datai 200 iku. Tang diatu, penyampau sida udah manggai 250,000 iku penginjil, lalu tu meh penyampau ti pemadu mayuh ba entara pampang opis di Eropah. Ketegal tu, penyampau bala sukarela ba Betel sereta bengunan pampang opis ke bukai mega majak nambah. Indah, pampang opis Itali sempat ngena 99 iti bengunan ba maya ti pemadu kisuk kena taun 2006. Pengudah semua projek tu tembu, ruang bilik Betel deka dikurangka, lalu pampang opis semina begunaka lima buah bengunan.

Kitai besampi ngambi Jehovah terus merekat projek tu, lalu arapka bengunan ke baru tu ulih meri saksi ba Itali, “umai nyau mansau, sedia deka diketau.”—John 4:35.