Menyadi Giandomenico Gullà nya seiku lutur ke gawa ba senentang kecemasan ba sebuah sepital di Erba, ke semak Como di Itali. Iya napi mayuh penusah ketegal penyakit COVID-19 ke balat berampit di serata dunya. Taja pia, iya ngasaika pemaik dalam ati ketegal pengarap iya, lalu tu nulung iya ngelantangka ati orang bukai. (2 Korint 1:4) Baru-baru tu, Menyadi Giandomenico bekunsika peneleba iya nengah siti interbiu enggau Begian Penerang ke Orang Mayuh ba Pampang Opis Itali.

Tu meh sebagi ari interbiu nya, ti udah diaduka mimit ngambika terang agi.

Nama utai ke ditapi nuan pengelama penusah COVID-19 tu nyadi?

Giandomenico Gullà: Ba sepital alai aku gawa, semua utai berubah enggau ngenyit, sempama tsunami. Semua begian sepital diatur baru nyentukka, diatu bisi senentang COVID-19 alai kami ngubat pesakit coronavirus aja. Sayau amat, semua pesakit coronavirus dikuarantin, lalu enda ulih betemu enggau diri sebilik, kaban belayan tauka bala kaban. Nyadi, aku meh ke betalipun ngagai ruang bilik tiap iku pesakit, ngambika madahka berita ngagai sida. Bisi sekali, urung tengah malam, aku patut betalipun ngagai anak lelaki seiku pesakit lalu madahka, indai iya nyau deka nadai. Nengah talipaun binching aku, anak lelaki nya video call ngambika ulih meda indai iya ke udah koma, sebedau iya madamka seput. Nya maya ti amat ngenusahka ati.

Baka ni nuan bulih pengelantang ati ari utai ke ditemu nuan ba Bup Kudus?

GG: Mayuh orang ke sama gawa enggau aku balat tusah ati sereta irau diatu. Tang aku ngasaika pemaik sereta pengelantang ati ketegal belajarka Bup Kudus kediri empu. Endang nyata, Jehovah udah nyikap kitai ngambi napi penusah baka tu. Aku nemu penyakit berampit tu nyadika bukti ke nunjukka jaku benabi ba Bup Kudus pasal hari it penudi benung dikeamatka. Tu ngasuh aku andal agi, sereta enda kelalu irau. Iya ke amat, pengarap aku dikeringka.

Baka ni chara Jehovah merindang ati nuan ulih nulung nuan merindang ati orang bukai?

GG: Aku ulih ngasaika roh kudus Iya nulung aku ba pengidup diri sebilik, ba kereja, sereta ba pengawa nyukung bala menyadi ke ditinggang penusah ketegal penyakit tu.

Terangka meh chara Jehovah nulung nuan ngambika merindang ati kita sebilik.

GG: Taja pan diatu aku patut gawa panjai agi jam ari ke selama, aku enggau naka ulih neruska sembah kami sebilik ngagai Jehovah, lalu tu udah ngeringka bini aku. Kami duai berasai beserakup agi. Pengawa belajarka Bup Kudus enggau diri sebilik pan udah nulung anak kami, Ginevra, ke beumur tiga taun. Iya ulih ngasaika semua utai nyadi lain diatu. Indah iya madahka munyi tu: ‘Aku enggai apai nurun kereja, laban bisi coronavirus ba dini-dini alai,’ tauka ‘Aku takut apai enda pulai ari kereja.’ Kena ngenyenangka ati iya, kami ningaka lagu asal, lalu enda berasai, iya tuchum baru.

Padahka chunto pasal chara nuan udah ngelantangka ati orang ke sama gawa enggau nuan.

GG: Baru-baru tu, seiku orang ke gawa ba begian ti sama enggau aku berengkah belajarka Bup Kudus. Suba kami kala gawa begulai ba sebuah sepital ke bukai, lalu kami belabuh berandauka Bup Kudus maya nya. Empai lama sebedau penyakit berampit tu nyadi, iya berengkah belajarka Bup Kudus enggau tetap, lalu iya agi ka terus belajar pengelama penusah tu. Diatu kami belajarka Bup Kudus nengah video call, kekadang indah kami belajar dua kali dalam seminggu. Utai ku iya amat negu ati aku, lebuh iya madah: “Bup Kudus udah ngasuh pengidup aku berinsur manah. Aku ngasaika pemaik, sereta enda balat irau. Aku tetemuka saut ti ngemuaska ati ngagai tanya pasal ari ni penatai mensia sereta penanggul ke ditapi kitai diatu. Pengarap ke diulih aku ngeringka aku sereta meri aku pengadang ke jemah ila.”

Baka ni chara nuan udah merindang ati bala menyadi ba eklisia nuan?

GG: Sayau amat, seiku menyadi indu ari eklisia aku [Menyadi Daniela Sgreva] kena rampit COVID-19 lalu patut dibai ngagai sepital ngambika berubat. Aku ngelala dua iku menyadi lelaki ke bisi kerita ambulans sida empu, lalu kami ngatur ngambika iya ulih diambi lalu dibai ngagai sepital. Kena ngambi menyadi indu tu, seduai iya deriba penyauh 50 kilometer (31 batu). Iya amat gaga ati meda penatai seduai iya! Lebuh iya sangkai ba sepital, taja pan utai ke nyadi ba iya amat ngenakutka, tang iya berasai lantang ati laban kami ngelaluka iya ba senantang kecemasan dia. Laban kami tiga semua gawa ba begian berubat, kami dikemendarka begulai enggau iya. Iya dikelingi bala menyadi! Pengerindu sereta sukung ke diayanka bala menyadi endang ngeringka menyadi indu nya. Ku iya madah, enggau ati ti beterima kasih: “Aku nemu Jehovah deka nyaga kitai, tang ba maya nya, utai ti dikereja Jehovah ngelui utai ke dijangka aku kereja Iya.”

Ninting hari aku patut majak bepanggai ba pengering ke diberi Jehovah. Maya aku mansang pulai ari endur gawa, aku ningaka lagu asal dalam kerita aku. Nya meh meri aku pengering ke diguna tiap hari. Aku meri terima kasih ngagai Jehovah. Seraya aku ningaka lagu Jehovah Seruran Ngimbai Kitai, aku ngingatka diri: ‘Jehovah seruran ngimbai aku. Iya deka megai jari aku, ngambika aku sedar, pengawa aku enda ngelebuka.’