Kena 30 Ogos 2019, Kot Besai Cassation ba Rome ngeluarka siti pemutus ti amat beguna pasal chara ngajar anak. Kot Besai Menua Itali meri seiku indai iya nya Saksi Jehovah, hak ngajar anak iya ke agi mit pasal pengarap ke dipegai.

Apai indai anak mit nya udah sarak, lalu apai iya ukai Saksi Jehovah. Apai anak mit nya bebendar deka ngajar pasal pengarap iya ngagai anak mit nya. Sebedau tu, apai anak mit nya mega kala ngapil kes tu ngagai dua iti kot ke mit agi. Kot ke mit agi madahka, enti anak mit nya diajar pasal pengarap ke bukai, nya ulih “ngachau runding” iya. Ketegal pemutus nya, indai anak mit nya tusah deka ngajar pengarap iya ngagai anak mit nya. Tang, iya ke bendar iya ulih ngereja nya. Nya kebuah, Kot Besai nginsil semua pemutus ke digaga kot ke mit, lalu ngemendarka anak mit nya diajar apai indai iya. Kot nya mega madahka, “enda ulih bechiping enggau semua pengarap.” Kot Besai mega madahka dua iti kot ke mit nya dikumbai, “bepilih mata” ngagai bala Saksi-Saksi Jehovah. Ari pemutus Kot Besai nya mega madahka, enti apai indai bisi enda sama runding pasal ni bagi pengarap ke deka diajar ngagai anak sida, akim tetap nadai hak mutuska ni bagi pengarap ke patut diajar ngagai anak sida.

Arapka pemutus ari Kot Besai tu ulih nyadi teladan ngagai semua kes ba Itali ke bekaul enggau chara ngajar anak. Pemutus tu mega amat beguna ngagai semua apai indai, kelebih agi ngagai sida ke deka ngiring anak ‘sida nyadi orang ke besai tuai dalam disiplin enggau ajar Jehovah.’—Epesus 6:4.