Kena 17 Disember 2019, Kot Besai Rome nukar pemutus ke digaga kot mit ke bekaul enggau bala anak mit ba Rome. Kot nya mutuska menyadi indu kitai nadai hak nyaga anak lelaki iya, ketegal iya enda ngemendarka bala lutur ngena darah maya berubat. Nya alai, Kot Besai nginsil pemutus nya, lalu mutuska menyadi indu kitai nya enda besalah. Iya pan ulih nyaga anak iya baru. Pemutus tu amat beguna ngagai semua bala menyadi kitai ke dudi hari. Udah tu, bala apai indai Saksi enda ibuh irau pasal hak sida, kelebih agi enti sida enggai nerima chara berubat ke bekenaka darah.

Kes tu berengkah, maya menyadi indu kitai sereta anak lelaki iya ke beumur sepuluh taun bisi eksiden. Anak menyadi kitai tu bakal, lalu dibai ke sepital. Tiga hari udah nya, lutur deka mutung iya. Menyadi kitai meri pemendar sereta setuju enggau semua chara berubat, tang iya semina enda setuju enggau chara berubat ke bekaul enggau darah aja, laban nya enda sejalai enggau pengarap iya. Taja pan anak iya enda kelalu balat, tang piak sepital enda setuju enggau pemutus menyadi kitai. Sida terus ngeriput kes tu, lalu ngumbai menyadi kitai enda nyaga anak iya enggau manah, nya kebuah sida mutuska deka ngambi hak iya nyaga anak diri. Kot nya pan ngaga pemutus nitihka utai ku orang ke bedawa, taja pan undang-undang udah nentuka kot enda ulih ngaga pemutus ke baka nya. Nya kebuah, menyadi indu kitai mai kes tu ngagai Kot Besai.

Kot Besai mega madahka menyadi indu kitai seiku indai ti manah, sereta amat ibuhka anak iya. Indah kot nya madahka, “Amat enda patut kitai ngumbai seiku indai enda nyaga anak diri ketegal iya deka nitihka utai ti diajar pengarap iya, lalu enggai nerima chara berubat ke bekaul enggau darah.” Nya alai, hak menyadi kitai nyaga anak iya dipulaika baru, lalu pemutus ke digaga sida nya dikumbai ngelanggar undang-undang.

Seiku pakar ke bejaku ngarika kes tu benama Nicola Colaianni. Iya seiku ari kauselor ba Kot Besai Cassation sereta professor pasal undang-undang ba Universiti Bari. Ku iya, “Aku pan setuju enggau penemu ari kot ke ngapil kes tu. Aku amat tusah ati enggau pemutus ari kot, kelebih agi pasal chara nyaga anak. Tu terang amat nunjukka, orang ke bepengarap tusah bulih pengelepas ba pengarap, kelebih agi bala Saksi Jehovah.”

Menyadi Christian Di Blasio, ka gawa ba Begian Penerang ke Orang Mayuh di pampang opis Itali madah, “Kami amat beterima kasih ngagai kot besai, laban nginsil pemutus digaga ketegal salah runding pasal pengarap. Bala Saksi-Saksi Jehovah amat ibuhka anak sida. Kami amat beterima kasihka pengawa bala lutur ke bebendar ngubat, tang tetap bebasaka pengarap kami.”

Pemutus ari kot tu ngeringka agi hak bala menyadi kitai pasal milih chara berubat ke bala anak sida. Kitai amat beterima kasih ngagai Jehovah, Petara kitai, laban ulih menang ba kes tu. Tu tentu nulung bala menyadi kitai milih chara berubat ke enda ngachau asai ati sida, tauka ke enda sejalai enggau penemu ari Bup Kudus.—Masmur 37:28.