Baru-baru tu, Kot Kasasi Besai Italy udah ngaga pemutus ti bepiak enggau Saksi-Saksi Jehovah ba siti kes pasal hak seseiku pesakit milih chara diri berubat. Kena 23 Disember 2020, Kot Besai nya ngetanka hak semua orang milih chara sida deka berubat, indah maya pemutus sida nya digaga ketegal pengarap orang nya.

Kes tu bekaul enggau cherita ti amat ngenyinuka ati. Kena taun 2005, seiku menyadi indu kitai bakal ketegal eksiden kerita, lalu patut beputung. Sebedau iya beputung iya enggau nyemetak madahka bala lutur iya enggai nerima darah, indah iya udah dulu nuliska peminta iya dalam kad Arahan Penjagaan Kesihatan. Taja pia, bala lutur nya enda pedulika utai ke dipinta iya, lalu terus meri iya darah mayuh kali.

Kot Kasasi Besai nya ngaku, enti orang enggai nerima darah lebuh berubat, tu “ukai semina peminta ngapa pasal ni bagi ubat ke dikedekaka iya, tang pemutus tu beduduk ba pengarap enggau utai ti dipechaya orang nya.” Kot nya pan ngumbai hak pesakit tu siti hak ti enda ulih dikachau, lalu enda tau enda dijaga baruh undang-undang menua.

Kenyau ari taun 2015 nyentukka diatu, tu meh kes ti kesepuluh ke diputarka Kot Kasasi Besai Itali ti nyukung Saksi-Saksi Jehovah. Ba tiap iti kes nya, Kot Besai udah nyukung pengelepas kitai ke bekaul enggau sembah kitai. Semua sepuluh iti kes nya pasal:

• Pemutus nulak chara berubat ti ngena darah: Saksi-Saksi Jehovah deka nerima chara berubat ti pemadu manah, lalu iya ke amat, amat mayuh chara berubat ulih diterima sida. Pemutus kot udah ngetanka hak Saksi-Saksi Jehovah milih chara berubat ti sejalai enggau pemutus penemu ati sida ti nitihka ajar Bup Kudus. Bala lutur enda tau enda bebasaka pemutus sida ti nulak chara berubat ti ngena darah. Tiap iku pesakit bisi hak iya empu ngaga pemutus tu nitihka pengarap iya.

• Ngemesaika anak: Apai indai ke Saksi sereta apai indai ti ukai Saksi, sama bela bisi hak ngajar anak sida pasal pengarap diri.

• Pengawa muai orang ari gerempung: Saksi-Saksi Jehovah ukai enda lurus enggau orang ke dibuai ari gerempung. Iya ke amat, Saksi-Saksi Jehovah bibas milih deka badu agi begulai enggau orang ke udah dibuai ari gerempung. Tu endang hak sida ngaga pemutus tu nitihka pengarap sida, lalu hak nya enda ulih dikachau orang bukai.

• Mayar chukai: Saksi-Saksi Jehovah mayar chukai ke patut. Tang enti gerempung pengarap tauka gerija ba Itali ke bukai enda ibuh mayar sekeda chukai, gerempung Saksi-Saksi Jehovah pan enda patut diasuh mayar nya.

Kitai gaga ati lebuh piak ti bekuasa ngaga pemutus baka tu, ti ngetanka hak Saksi-Saksi Jehovah besembahka Petara enggau bibas.—Jaku Dalam 21:1.