Kot Apil di Milan, Itali, baru meri pemutus ti nyukung sepasang laki-bini ke Saksi Jehovah, dalam siti kes pasal chara anak seduai iya diberi ubat ba sepital. Ketegal pemutus tu, enti apai indai minta anak sida berubat enggau chara ti enda ngena darah, kot ba Itali enda ulih ngerampas hak apai indai nya ngaga pemutus ngarika anak sida. Kot nya ngetanka hak apai indai ngaga pemutus sejalai enggau pengarap sida, iya nya nulak chara berubat ke ngambi darah ari tubuh orang bukai lalu diberi ngagai anak sida.

Kena bulan September 2019, sepasang laki-bini ke Saksi ngemai anak indu sida ke beumur sepuluh bulan ngagai sepital, laban anak nya bakal pengudah iya labuh. Bala lutur mutuska anak nya patut beputung ba pala iya. Pengawa beputung nya mujur, sereta enda ibuh ngena darah.

Tang pengudah nya, lebuh anak nya udah abis beputung sereta semina diau ba sepital nyentukka suman, seiku lutur minta pemendar ari apai indai, meri anak nya darah ngambika “nyukung” chara berubat ke udah dikena ba iya. Tang apai indai nya nulak nya, lalu minta bala lutur ngena chara berubat ti bukai ti suah dikena lutur ba sepital.

Ari ke bebasaka pemutus apai indai nya, lutur nya ngangauka polis enggau opis penawa ba kot. Opis penawa lalu bulih surat ari kot ti natak hak apai indai ngaga pemutus pasal chara berubat ke anak sida, lalu meri hak nya ngagai pengarah sepital. Tang baik ba pengujung iya, anak mit nya enda nyadi diberi darah, laban bala lutur ngasaika iya enda begunaka nya.

Mayuh stesen berita TV enggau pemerita surat khabar ba Itali madahka pasal kes tu. Tang mayuh pemerita salah tusui, nyawa anak mit nya selamat ketegal kot mutuska iya patut nerima darah.

Kena 10 September 2020, Kot Apil Milan nginsil pemutus ke kala digaga kot bukai, ti natak hak apai indai nya. Kot Apil nya pan madahka, kot ke bukai nya endang besalah lebuh sida meri surat nya, indah kot nya nadai hak bepecharaka kes ke baka tu.

Dalam pemutus ke dikeluarka Kot Apil Milan bisi ditulis: “Apai indai nya nulak chara berubat ti ngena darah ketegal pengarap sida. Peminta sida tu, sigi enda ulih nyadika bukti kena nunjukka sida tu apai indai ti jai sereta enda patut ngaga pemutus ngarika anak sida.” Dalam setaun ti udah, tiga buah Kot Apil ba Itali udah nyukung apai indai ke Saksi, ti minta lutur ngena chara berubat ke bukai (ti nadai ngena darah) ba anak sida.

Piak ti bekuasa, undang-undang menua sereta piak sepital patut nemu, ketegal pengarap, ukai reti iya Saksi-Saksi Jehovah terus pechaya, sida deka gerai ketegal pengawa ajih, tauka ngumbai sida nulak semua macham chara berubat ke bukai. Iya ke amat, sida deka berubat ba sepital ti moden, ti ngena perengka ke ngam sereta lutur ti bepeneleba ngambika ulih berubat enggau chara ti enda ngena darah. Sida deka nerima chara berubat ti pemadu manah, semina anang bekenaka darah aja. Mayuh lutur ti bepeneleba sereta dipebasa, ke gawa ba sepital besai di serata dunya, sanggup nulung Saksi-Saksi Jehovah enggau chara enda meri darah ngagai sida.

Kitai beterima kasih ke pemutus ke digaga kot tu, ti nyukung bala menyadi kitai ke bebendar deka milih chara berubat ke anak sida, enggau chara ti pemadu manah, sereta sejalai enggau pengarap sida.—Surat Kereja Rasul 15:29.