Baru-baru tu mayuh penanggul ba ekonomi di Itali. Pia mega, penyakit COVID-19 balat ngelekai ba menua nya. Taja pia, projek mindahka Pampang Opis Itali ngagai nengeri Bologna agi diteruska. Sebuah bengunan alai menyadi ke gawa ba Betel diau nyadika bengunan ti keterubah tembu, kena 5 September 2020. Nitihka jadual ke diperambu, projek tu deka tembu kena ujung taun 2023.

Bisi lima iku menyadi lelaki gawa ba Komiti Projek Nirika Bengunan (CPC) ke ngemataka semua pengawa ke bekaul enggau projek tu. Siti kompeni diasuh ngaga pelan lalu nirika bengunan keterubah tu. Pengawa nirika benunan nya udah berengkah kena bulan September 2018.

Ba taun 2019, penanggul ekonomi ti besai ninggang mayuh kompeni ba Itali. Ketegal nya, kompeni ke diasuh nirika bengunan tu dipejal ngetu dulu lalu nukar sekeda ari pelan sida. Tang pemanah iya, pugu bengunan nya udah tembu maya nya, nya alai projek nya enda bangat ditangguh.

Ba pun taun 2020, penyakit COVID-19 balat amat mangka Itali utara, nyengkaum nengeri Bologna. Piak bekuasa ba endur nya meri sekat ba mayuh pengawa, nyengkaum projek nirika bengunan. Tang pengudah sebulan, sekeda ari sekat nya dikurangka lalu projek nya ulih diteruska. Sekumbang projek nya dipejalaika, semua sekat ari perintah menua sereta ari gerempung kitai empu ditihka enggau silik ngambika nyaga pengelikun.

Menyadi Paolo Comparato, seiku menyadi ari CPC, nerangka: “Kami beterima kasih ngagai Jehovah ke pemansang tu. Enti nadai sukung ari Iya, kami tentu enda ulih mutarka semua penanggul ke nyadi tu.”

Cristina Dallacasa ke ngarika kompeni ke diasuh nirika bengunan tu madahka: “Kami amat gaga ati laban dipilih Saksi-Saksi Jehovah nirika bengunan ti besai reti ke sida ba Itali. Ketegal kami bekerejasama enggau sida, nya baru kami ulih mutarka semua penanggul ke ditapi ba projek tu. Saksi-Saksi Jehovah amat bejimat lebuh nirika bengunan, kelebih agi sida bejimat nyaga pengelikun orang ke gawa ba projek sida. Ke berat agi, aku amat gaga laban tetemuka seraban orang ke amat lurus ati sereta ulih dikearapka. Nya amat beguna, kelebih agi diatu ba maya penanggul besai ba ekonomi sereta penyarut nyadi ba menua.”

Kitai andalka Jehovah deka terus nyukung projek tu nyentukka abis, ngambika nya ulih ngemuliaka nama Iya.—Masmur 127:1.