Baka ba mayuh menua bukai, rayat ba Itali ke enggai nyadi soldadu ketegal pengarap sida, bisi hak ngaga pemutus sida empu. Tang, enda baka nya suba ba menua Itali. Pengudah betaun-taun Saksi-Saksi Jehovah ba Itali ngelengkaka pengelepas diri, baru meh undang-undang ba menua nya berubah ngambika ngetanka hak mensia.

Dalam bepuluh taun pengudah Perang Dunya II, nitihka undang-undang menua Itali, semua orang lelaki diasuh nyadi soldadu. Keterubah iya, kena taun 1946 (ba pengunjung perang nya,) semina 120 iku Saksi di serata menua Itali. Tang, nyau kelama, penyampau Saksi di Itali majak nambah. Nya alai, majak mayuh nembiak lelaki ke nyadi Saksi, enggai nyadi soldadu. Pemutus sida tu bepelasarka utai ke dipechaya sida ari Bup Kudus, nyengkaum ajar pasal orang Kristian patut mengkang neutral, enda beperang sereta rinduka orang bukai.

Baru-baru tu, Pampang Opis Itali ngaga pansik pasal pekara tu. Sida tetemuka abis nadai 14,180 iku menyadi lelaki ke kala dijil ketegal enggai nyadi soldadu, agi idup diatu. Entara taun 1965 enggau 1998, sida tu dijil pengelama 9,732 taun.

Sergio Albesano, seiku pakar sejarah ba Turin, Itali madahka, pemayuh nembiak ke dijil ketegal enggai nyadi soldadu nya Saksi-Saksi Jehovah. Iya mega nerangka, terima kasih ngagai sida ke ngayanka pengarap ti teguh, “penanggul ba undang-undang Itali tu ulih ditemu orang mayuh.”

Giulio Andreotti kala nyadi Menteri Besai ba menua Itali, lalu entara taun 1959-1966 iya mega nyadi Menteri Perang. Maya nya, iya empu deka betemu enggau sekeda Saksi ti benung dijil, ngambika betanyaka sida, lalu mereti agi kebuah sida enggai nyadi soldadu. Iya lalu nulis: “Aku amat alit ati enggau penegap pengarap sida, ti enggai masuk champur dalam sebarang hal politik. Ukai pia aja sida ngaga pemutus tu, lalu ulih natka diri dijil betaun-taun.”

Taun 1972 meh kali keterubah undang-undang digaga ti ngetanka hak rayat ke enggai nyadi soldadu. Tang sayau amat, taja pan undang-undang nya ngemendarka rayat milih ngereja pengawa bukai ari ke nyadi soldadu, tang pengawa ke bukai nya agi bekaul enggau pengawa beperang. Bala menyadi kitai maya nya enda ulih nerima pengawa tu.

Nyau kelama, kena 8 Julai 1998, perintah Itali ngaga undang-undang ti baru. Baru meh orang ke enggai nyadi soldadu ulih milih ngereja pengawa ke bukai ti nadai kaul enggau pengawa soldadu. Nya alai, atur ti baru tu ulih diterima Saksi-Saksi Jehovah. Lalu, kena Ogos 2004, menua Itali ngaga undang-undang ti baru ti madahka, kenyau ari Januari 2005 nadai orang deka dikangau nyadi soldadu.

Mayuh pakar ngaku, pemansang ba undang-undang tu ulih nyadi ketegal pengarap Saksi-Saksi Jehovah ba Itali. Seiku ari sida, ke banama Sergio Lariccia, nya luyar sereta pengajar undang-undang ba Sapienza University of Rome. Ku iya: “Suba, tuai pengarap ke gawa enggau bala soldadu madahka, orang ke enggai nyadi soldadu ‘orang buyan,’ ti ‘ngenyaika menua,’ lalu pemutus sida ‘sigi nadai kaul enggau pesan Kristian ti ngasuh rinduka orang bukai.’ Tang, ketegal Saksi-Saksi Jehovah tegap ba pengarap sereta ngetanka pemutus sida, tu ngujungka pemansang ba undang-undang Itali, sereta nulung ngubah runding orang mayuh pasal pekara tu.”

Pemutus bala menyadi kitai nya ukai semina mai ubah ba undang-undang menua Itali. Bisi mega sekeda jejaga rumah jil, ke nyadi Saksi Jehovah pengudah sida meda pemanah ulah bala Saksi ke dijil. Seiku ari sida ke benama Giuseppe Serra ngenang: “Teladan sida Saksi Jehovah ke agi biak, meransang aku . . . berengkah belajarka Bup Kudus.” Iya lalu nyadi seiku Saksi kena taun 1972. (Peda kutak ba baruh.)

Kitai gaga ati ngenang baru pasal pemerani bala menyadi lelaki, enggau diri sebilik sida, ba Itali. Pia mega, enggau mayuh menyadi ke bukai di serata dunya, ti bebendar deka nitihka pesan Bup Kudus ke ngasuh kitai “nadai agi nyendiaka diri beperang.”—Isaiah 2:4.