Hari Enam, 13 April 2019, Menyadi Stephen Lett ari Raban ti Ngiring ngeluarka Bup Kudus Salin Dunya Baru dalam bansa jaku Jepun. Bisi 20,868 iku orang ke ngulu pengawa tu ba Stadium Noevir Kobe, Jepun. Atur tu mega bisi dipandangka terus nengah internet, ba lapan iti Palan Gempuru Besai sereta mayuh agi Palan Gempuru bukai, di baruh jaga pampang opis Jepun. Kelimpah ari nya, sekeda Palan Gempuru ke enda ulih meda terus nengah internet, ulih meda video ke dirikut ba hari ti sama, tang jam ti bebida, tauka sida ulih meda ba hari siti. Penyampau orang ke datai ngagai pengawa tu, bisi 220,491 iku orang.

Bisi lebih ari 2,950 eklisia, raban, enggau raban ti keterubah ke ngena bansa jaku Jepun bisi ba serata dunya. Kitai tentu gaga ati ulih enggau sida, laban sida diatu bisi Bup Kudus Salin Dunya Baru ke udah diaduka. Tu siti pemeri ti besai reti ari Petara Jehovah ke ulih dikena sida belajarka Bup Kudus enggau nginjil.—Hebrew 4:12.

Bup Kudus Salin Dunya Baru endang udah bisi dalam bansa jaku Jepun kenyau ari 45 taun ti udah. Ba taun 1973, Menyadi Lyman Swingle, seiku ari Raban ti Ngiring, ngeluarka New World Translation of the Christian Greek Scriptures ba Gempuru Besai Internasional, “Divine Victory” ke diatur ba Osaka, Jepun. Pengelama semilan taun, pengudah Bup Kudus nya dikeluarka, bisi 1,140,000 iti Bup Kudus disadung. Penyampau tu, kira-kira 75 kali lebih ari penyampau bala Saksi-Saksi Jehovah di Jepun maya nya. Lalu ba taun 1982, Bup Kudus Salin Dunya Baru pan tembu dikeluarka. Bup Kudus nya dichelak ba Jepun. Diatu, kena 2019, Bup Kudus Salin Dunya Baru ke diaduka tu, nyadika tanda sejarah dalam pengawa nyalin Bup Kudus ngagai nembiak Jehovah ba Jepun.

Salin Dunya Baru udah disalinka penuh tauka sebegian dalam 179 bengkah bansa jaku, nyengkaum 22 iti salin ti penuh ari jaku English ke udah diaduka baru ba taun 2013.