Kena 12 ngagai 13 Oktober 2019, Ribut Hagibis nyadi ba Jepun lalu ngujungka ampuh bah nyadi. Ribut tu nabanka 77 iku nyawa, ngujungka mayuh rumah nadai karan, sereta nadai ai. Nyentukka seharitu, piak bekuasa ba Jepun agi begigaka orang ke ditabanka penusah tu. Kenyau ari taun 1958, Jepun bedau kala dipangka ribut sepemesai tu, enggau pemalat ujan lebih ari 889 milimeter ba sekeda endur.

Nadai riput madahka menyadi Kristian kitai lenyau tauka bebadi ketegal penusah tu. Tang 10 iku ari sida bisi telih mimit, lalu lebih ari 1,200 buah rumah menyadi kitai rusak. Ari 23 buah Palan Gempuru ke rusak, 3 ba entara nya enda ulih dikena laban ampuh tauka nadai karan. Palan Gempuru Besai ba Tochigi mega bisi rusak mimit.

Komiti Tulung Pengerusak Alam udah diatur ba Fukushima enggau Nagano. Ari pengerusak ke nyadi, engka mayuh agi komiti ke baka tu deka ditumbuhka. Bantu ba ai ti beresi sereta pemakai disadung ngagai semua menyadi ke nyadi mansa. Bala tuai ti ngabas ba endur nya diasuh datai meransang sereta ngeringka pengarap sida.

Kitai amat andal, Jehovah aja meh nyadi endur semua bala menyadi kitai ke napi penusah tu bepanggai.—Masmur 142:5.