Kena 18 Disember 2021, Menyadi Dirk Grundmann, seiku ari Komiti Pampang Opis Eropah Tengah ngeluarka bup Matthew enggau bup John dalam jaku Bengal-Bisu Jerman, iya nya begian ti keterubah dikeluarka ari Bup Kudus Salin Dunya Baru. Kira-kira 800 iku orang bisi meda program video tu ke dipandangka terus.

Perintah Jerman enda nerima jaku Bengal-Bisu Jerman nyadika bansa jaku rasmi nyentukka taun 2002. Taja pia, kenyau ari taun 1960-an, Saksi-Saksi Jehovah nyalin program gempuru besai enggau konvensyen dalam jaku Bengal-Bisu Jerman. Kemayaharitu, bisi 571 iku penginjil ba dalam 11 buah eklisia enggau 21 buah raban ke ngena jaku Bengal-Bisu Jerman.

Tu meh kali keterubah bup mit dalam Bup Kudus disalin ngagai jaku Bengal-Bisu Jerman. Sebedau tu, bala penginjil semina ulih meda sesiti ayat Bup Kudus lebuh belajarka Bup Kudus kediri empu, tauka nginjil.

Seiku penginjil madah: “Ketegal nadai bup mit disalin enggau penuh, tang semina bisi sesiti ayat aja, kekadang nya tusah deka ngiga prinsip Bup Kudus tauka bukti ti nyukung utai ke dipechaya kitai. Pia mega, tusah deka meransang pemelajar Bup Kudus deka belematika Bup Kudus ninting hari, laban enda senang sida meda siti-siti ayat aja.”

Seiku penyalin madah: “Pengawa nyalin Jaku Petara ngagai bansa jaku ke ulih dimeretika orang ke bengal, lalu nulung sida nyadi pangan Jehovah, nya utai ti amat manah. Kami berasai amat beterima kasih laban diasuh gawa ba projek tu.”

Kitai besampi ngambika Bup Kudus Salin Dunya Baru dalam jaku Bengal-Bisu Jerman deka nulung mayuh orang ke baruh ati ngelala jalai Jehovah.—Masmur 25:9.