Baka berita ari The New York Times, Jehovas Zeugen ba Deutschland a benung ngulihka baru arkib Kusserow sebilik ke benung dipegai Bundeswehr Military History Museum ba Dresden, Jerman. Arkib tu endang enggi Jehovas Zeugen ba Deutschland. Kelebih agi, ngulihka arkib nya deka nulung ngemanahka nama diri sebilik tu.

Bisi 13 iku ari ruang bilik Kusserow balat diperinsa Nazi laban sida Saksi-Saksi Jehovah. Dua iku anak lelaki, iya nya Wilhelm enggau Wolfgang, dibunuh ketegal enggai nyukung ba pengawa soldadu Nazi. Paul-Gerhard Kusserow, iya nya anak ke pemadu biak, ke seiku aja agi idup, madahka: “Madi aku mati laban enda nyukung ba pengawa soldadu. Aku enda setuju pesaka tu patut disimpan kelebih agi ba muzium soldadu.” Nya alai, kena ngemetulka pekara tu, Jehovas Zeugen ba Deutschland nguji deka ngulihka baru arkib Kusserow ari muzium nya.

Nambahka nya, Saksi-Saksi Jehovah bisi dokumen ke nunjukka Annemarie Kusserow, iya nya anak ke pemadu tuai, udah meri arkib ke disimpan iya enggau manah ngagai Jehovas Zeugen ba Deutschland. Arkib nya ngembuan lebih ari 1,000 iti utai nyengkaum gambar, lukisan, surat ke ditulis sebedau sida mati, notis jaku gerah pasal ukum mati, sereta riput ari Gestapo. b

Annemarie nadai kena taun 2005. Enda lama udah nya sida nyau nemu Bundeswehr Military History Museum udah ngambi arkib nya. Ku muzium nya madah, sida udah meli arkib nya enggau sah sereta lurus ari seiku ruang bilik Kusserow ke nadai agi enggau Saksi-Saksi Jehovah, lalu udah nadai ba maya nya.

Nyauka pengelama tujuh taun, Jehovas Zeugen ba Deutschland enda ulih mutarka utai tu entara muzium enggau manah. Nya alai, sida ngena undang-undang kena ngambi pulai utai ke enggi sida.

Enti mujur, sida ngarapka arkib nya disimpan dalam muzium ba Pampang Opis Eropah Tengah di Selters, Jerman. Ba dia, beribu iku orang ari serata dunya ulih datai ngelawa enggau enda bebayar lalu belajar pasal diri sebilik Kusserow ti tegap ba pengarap. c