Menyadi Jean-Yves enggau bini iya, Vasthie Mudaheranwa, bekereja nulung orang ke kena coronavirus di Montreal, Kanada. Menyadi Jean-Yves nya seiku lutur ke gawa ba sepital, lalu Menyadi Vasthie nya seiku indu misi ke gawa ba senentang wad pesakit COVID-19. Taja pan mayuh orang balat irau sereta takut maya tu, seduai iya ngasaika Jehovah endang ngeringka sereta ngelantangka ati sida, baka ke udah disemayaka Iya.—Isaiah 65:14.

Ku Menyadi Jean-Yves madah: “Mayuh orang ke gawa enggau aku takut. Aku nadai kala meda sida balat takut baka ke diatu.” Menyadi Vasthie madah, “Belajarka Bup Kudus amat nulung. Kami belematika tanda hari ti penudi, lalu kami ngingatka diri, Jehovah endang bisi enggau kami, Iya nadai kala ninggalka kami. Besampi ngagai Jehovah mega mayuh nulung kami. Ninting hari, sebedau aku nurun kereja, aku besampi dulu lalu ngasaika pemaik.”

“Menua asal aku nya Rwanda, lalu aku diau dia maya genocide (pengawa ngemunaska sesiti bansa) nyadi,” ku Menyadi Jean-Yves nerang. “Ba Kanada, kami nadai kala ngasaika utai baka tu, nyadi, kekadang kami nyau enda ingat agi, kitai idup ba hari ti penudi. Taja pan kitai selalu patut beratika hari Jehovah ke nyau majak semak, tang aku ngaku diri kekadang enda berundingka nya. Ari meda penusah penyakit berampit tu, pengarap aku ngagai Bup Kudus, sereta utai ke dipadah Bup kudus pasal hari ti penudi enggau jemah ila, majak teguh.”

Pengarap enggau pengandal Menyadi Jean-Yves seduai Vasthie nya sama baka ke dikembuan nembiak Jehovah di serata dunya, indah ba maya ti tusah tu.—Isaiah 48:18.