Saksi-Saksi Jehovah ngeluarka Bup Kudus Salin Dunya Baru ba gempuru besai pelilih menua di Kisumu, Kenya kena 30 Ogos 2019. Menyadi Remy Pringle, seiku ari Komiti Pampang Opis Kenya, ngeluarka Bup Kudus nya ba hari keterubah maya gempuru besai. Penyampau orang ke datai bisi 2,481 iku. Nyengkaum sida ke meda program tu ba dua iti endur bukai ngena internet.

Bup Kudus tu ngambi awak tiga taun disalin. Seiku ari penyalin madahka, “Bup Kudus tu amat beguna ngagai semua bala menyadi Kristian. Sida udah lama nganti Bup Kudus Salin Dunya Baru ti tembu dalam bansa jaku Luo. Mayuh ari ruang bilik Saksi enda tebelika Bup Kudus ngagai tiap iku sida sebilik. Nya kebuah sida amat beterima kasih enti ngembuan Bup Kudus kediri empu. Kelimpah ari nya, salin tu ngena leka jaku ke dikena orang kemayaharitu. Nya kebuah sida senang agi belajarka Bup Kudus kediri empu tauka belajarka Bup Kudus ba diri sebilik kena negapka pengarap.”

Bup Kudus Salin Dunya Baru udah tembu disalin tauka setengah ari nya ngagai 184 iti bansa jaku. Entara nya, bisi 25 iti Bup Kudus ti tembu digaga nitihka edisyen 2013. Diatu, bisi 1,800 penginjil ngena bansa jaku Luo ba Kenya. Kitai amat pechaya, Bup Kudus ke baru dikeluarka tu nulung sida terus semak ngagai Jehovah, lalu sida ulih nginjil enggau manah agi ngagai 5 juta iku orang ke ngena bansa jaku Luo.—Matthew 24:14.