Ba taun 2018, Kot Constitutional enggau Kot Besai ba Korea Selatan madahka, seseiku orang bisi hak nulak pengawa soldadu ketegal asai ati sida ke bekaul enggau pengarap. Lalu pengawa sida nya enda agi dikumbai penjenayah. Nya kebuah empai lama ti udah, 1,879 iku orang ke dijil ketegal kes tu dilepaska. Lalu kena 31 Disember 2019, pemerintah meri jaku gerah, orang ke kala dijil nya deka nerima pengelepas ti spesial. Taja pan nama sida udah dikumbai penjenayah, tang sida deka dilepaska ari sebarang ukum ke bukai.

Ba Korea, orang ke udah abis timpuh sida dijil, deka ditagang pemerintah ari ngereja sekeda utai dalam timpuh lima taun. Sebedau tu, bala menyadi lelaki kitai mega bisi ukum ke baka tu. Ketegal nya, sida enda ulih enggau sebarang peresa tauka nerima surat pemendar ke sebarang utai, lalu pia mega pengawa ke ulih dikereja sida mega bisi tatak.

Menyadi Hong Dae-il, ke ngatur ba begian Humas Korea Selatan madahka, Kitai amat beterima kasih ngagai pemerintah ketegal udah meri pengelepas ke baka tu. Pia mega, kitai amat ngarapka pemerintah badu agi ngumbai orang ke nulak pengawa soldadu nya pengawa jenayah.”

Seraya kitai nganti utai manah ke nyadi ba Korea Selatan, aram meh kitai terus ngemuliaka Jehovah.—Pemandang 4:11.