Kena 28 Januari 2021, Kot Besai Korea Selatan ngaga pemutus, enti seseiku orang ke kala dilatih nyadi soldadu dikangau baru kena iya nerima latih, tang iya empu enggai nerima ketegal pengarap diri, nya ukai siti jenayah. Reti iya, bala menyadi kitai ba Korea Selatan ke kala dilatih nyadi soldadu sebedau nyadi seiku ari Saksi-Saksi Jehovah, nadai agi dituduh tauka dipechara.

Dalam timpuh lapan taun pengudah seseiku orang nerima latih nyadi soldadu ba Korea Selatan, iya deka dikangau beberapa kali da agi kena iya dilatih baru. Ketegal tu, orang ke kala nyadi soldadu tang udah nya ka nyadi seiku Saksi Jehovah, suah dituduh sereta diukum ba kot. Indah bisi kes seiku menyadi lelaki ke diasuh mansang ngagai balai polis, opis penawa, kot sereta kot apil 60 kali dalam setaun aja.

Kena taun 2018, dua iti kot ti pemadu besai ba Korea Selatan mutuska orang ke enggai nyadi soldadu ketegal pemutus penemu ati diri empu, enda patut dikumbai besalah. Ketegal pemutus tu, orang Kristian ti enggai nyadi soldadu ulih diberi pengawa bukai ke penguntung menua, ti nadai sangkut paut enggau pengawa soldadu. Tang, kedua-dua kot nya nadai meri iring pasal sida ke kala dilatih nyadi soldadu tang enggai agi dilatih baru ketegal pengarap diri. Nya kebuah nyentukka diatu sida agi diukum ba kot di Korea Selatan.

Pemutus ti baru tu ari Kot Besai nejuka orang nulak pengawa tauka latih soldadu ketegal sida udah nukar pengarap. Diatu, bala menyadi lelaki ke udah lama sereta suah dipechara ba kot pasal hal tu ulih minta diri diberi pengawa bukai ari ke diukum jil tauka didenda. Menyadi Nam Tae-hee, seiku ari menyadi ke diperesa ba kes tu nerangka: “Dalam lapan taun ti udah, aku udah mayuh kali dipechara ba kot. Baru diatu meh kot bebasaka pemutus aku. Aku ngasaika baka ma ti berat ke disan aku ngelama tu, baru lenyau ari aku.”

Kitai semua gaga ati sereta beterima kasih ngagai Jehovah, ke udah nulung bala menyadi lelaki kitai enggau diri sebilik sida ba Korea, ti udah ‘liat ati natka pemedis ti ukai patut ditatka sida ketegal sida nemu peneka Petara’!—1 Peter 2:19.