Haribulan: 13-15 September 2019

Endur: KINTEX (Korea International Exhibition Center) ba Seoul, Korea Selatan

Bansa Jaku ke Disediaka: China Mandarin, English, Indonesia, Korea, Rusia, Vietnam

Penyampau Orang ke Datai: 60,082

Penyampau Orang ke Dibaptisa: 478

Penyampau Bala Menyadi ari Menua Bukai: 6,076

Menua ke Dikelaluka Datai: Brazil, Czech-Slovak, Finland, Perancis, Greece, Indonesia, Kazakhstan, Malaysia, Scandinavia, Amerika Serikat, Vietnam

Peneleba ti Manah: Choi Ji-woong, pengarah ba siti kompeni ke nyediaka pemakai ke bala menyadi ari menua bukai madahka, “Bala pekereja aku madah, sida ulih meda bala Saksi Jehovah manah ati. Aku amat alit ati meda Saksi Jehovah ke Korea rinduka orang ari menua bukai, taja pan sida baru betemu. Sida baka kaban ke udah lama enda betemu. Aku suah enggau mayuh pengawa ke bekaul enggau pengarap, tang begulai enggau bala Saksi Jehovah, tu siti peneleba ti amat spesial.”

Ahn Seon-ju, seiku ari orang ke gawa ba Eutteum Tour Agency madahka, “Pengudah meda pemanah sereta meda Saksi Jehovah ti seruran tuchum, aku ngasaika, bala deriba bas kami pan patut neladan sida. Keterubah aku berunding, baka ni sida tau ulih tuchum baka nya. Tang, pengudah gawa enggau Saksi Jehovah, baru meh aku nemu, sida ulih ngereja nya ketegal sida bisi pengerindu sereta bebasaka pangan diri. Pengarap sida ulih dipeda ari ulah sida. Aku amat rindu meda Saksi Jehovah gawa enggau sukarela, ukai dibayar. Ketegal Saksi Jehovah selalu ngaga utai enggau ati ti deka, lalu disengkaum enggau tuchum, aku ngasaika diri patut berubah baka sida. Enti bisi peluang, aku agi ka gawa begulai enggau Saksi Jehovah.”

Kim Gyo-Shik, pengarah ba MBC Munhwa Broadcasting Station Dae-jang-geum Theme Park madahka, “Program ke diatur Saksi Jehovah tu amat ngerinduka ati. Taja pan aku pengarap Katolik, tang ari program sida aku ulih meda, ulah ke patut dikembuan orang Kristian ti bendar. Bala pekereja sereta aku empu beratika, bala Saksi ulih bekerejasama enggau pangan diri. Sida manah enggau orang bukai, sereta selalu nanya dulu enti sida deka ngena sebarang perengka kami, indah ba utai ti mit aja. Aku amat bebasaka sida taja pan aku empu ukai Saksi Jehovah.