Perintah Korea Selatan udah berengkah meri peluang ngagai orang ke enggai nyadi soldadu, ngereja pengawa bukai ari ke dilatih beperang. Tu meh keterubah kali dalam sejarah menua nya, pengawa tu dipejalaika. Kena 26 Oktober 2020, 63 iku menyadi kitai berengkah enggau pengawa tu ba dua buah rumah jil. Sida deka diasuh bekereja dia pengelama tiga taun. Pengawa ke diasuh kereja sida nya manduk enggau nyuaka pemakai, bebelika barang, ngajar orang jil, nyaga pemeresi enggau pengerai orang sereta begian ngerepair. Nitihka atur tu, dalam dua bulan ti keterubah, sida enda ulih pansut ari endur nya. Tang pengudah timpuh dua bulan, sida ulih pansut enti udah nembuka semua pengawa ke diberi ngagai sida, ngambika sida datai gempuru tauka nginjil. Tang ukai semua sida ulih pansut ba maya ti sama. Sida ke dikemendarka pansut, enda tau enda pulai ke rumah jil alai sida gawa sebedau pukul 9 malam.

Menyadi Kim Hyun-soo, seiku ari sida ke 63 iku nya nerangka: “Iya ke amat, atur ari perintah tu ukai nitihka standard entarabansa ke udah ditetapka. Taja pia, aku nerima pengawa tu laban nya sigi nadai kaul enggau pengawa soldadu.”

Kitai nemu bala menyadi lelaki ke biak ba Korea Selatan deka ngemuliaka sereta mai puji ngagai nama Jehovah, ketegal “pemadas pengawa” sida.—Matthew 5:16.