Gerempung kitai Saksi-Saksi Jehovah ba Malta (JW-Malta) baru-baru tu udah nyadi siti gerempung ke udah sah direjista ba menua nya. Kena 28 Disember 2021, JW-Malta udah bulih sijil rejista sah. a

Saksi-Saksi Jehovah udah ditumbuh ba Malta kenyau ari 1970-an. Tang, pengelama betaun-taun, semua eklisia semina diiktiraf mimit aja, tauka langsung enda diiktiraf ari segi undang-undang. Nyadi, tu amat tusah ba eklisia kena ngembuan reta tauka muka akaun bank. Kena 1994, Gerempung Nembiak Bup Kudus Entarabansa (IBSA) nyadi gerempung ke enda direjista ba Malta. Taja pan IBSA bulih sekeda hak, tang tu bisi tatak. Baru-baru tu, JW-Malta diiktiraf. Tu ngasuh pengawa opis Saksi-Saksi Jehovah enggau eklisia ba Malta nyadi senang agi.

Lebuh berunding pasal pengawa ngerejista tu, Menyadi Joe Magri, seiku ari raban Komiti ke Nyaga Menua Malta madah: “Pengarap kami ditegapka lebuh kami meda chara Jehovah nulung kami bulih pengiktirafan sah. Iya meri kami bantu nengah bala menyadi ari Begian Undang-Undang ba Britain enggau indu opis ngambika ulih ngerejista tu enggau mujur. Enggau ngena nama Jehovah maya ngerejista, kami amat gaga ati ulih nyukung Perintah Petara sereta muji Jehovah enggau manah agi.”

Diatu bisi lebih ari 800 iku Saksi di Malta ke gawa ba 11 iti eklisia. Kitai amat gaga ati laban pengawa ‘nusui pasal Perintah Petara’ ke digaga rasul Paul ba Malta nyau ka 2,000 taun suba ulih terus mujur lalu “nadai utai nekul.”—Surat Kereja Rasul 28:1, 30, 31.