Pampang opis Masedonia Utara ngatur pengawa nginjil ti spesial berengkah ari 1 Ogos ngagai 31 Oktober 2019. Tuju kimpin tu deka madahka Berita Manah ari Bup Kudus ngagai orang ke diau ba endur ke dipegai sida, ti ngena bansa jaku Masedonian enggau Albanian.

Ba Masedonia Utara, lebih ari 1.3 juta orang ke ngena bansa jaku Masedonian, lalu lebih ari setengah juta orang ngena bansa jaku Albanian. Tang, ba menua nya semina bisi 1,300 iku penginjil. Dalam 1,000 iku ari sida ba endur ke ngena bansa jaku Masedonian, tang semina 20 iku aja ke ba endur ngena bansa jaku Albanian. Ngambi ulih nulung sida ba kimpin ti spesial tu, bisi 476 iku bala menyadi ke datai ari tujuh bengkah menua iya nya, Albania, Austria, Belgium, Jerman, Itali, Sweden, enggau Switzerland.

Bisi sekali, seiku menyadi lelaki kitai betemu enggau seiku pengibun kambing ba tisi jalai. Maya lelaki nya nemu kitai tu Saksi Jehovah, iya terus mansutka bup Nama Ajar Bup Kudus ari bik iya. Iya madahka, iya nerima bup nya sepuluh taun ti udah. Bisi Saksi Jehovah ari Itali meri bup nya ngagai iya, maya sida ngaga kimpin ti spesial. Pengibun nya madahka diri tiap hari macha bup nya. Nyentukka iya ulih ingat sekeda ayat. Nya alai, bala menyadi ngaga atur deka ngabas iya baru.

Sukung ke diberi bala menyadi ba pengawa tu amat ngalitka ati. Tu ngingatka kitai pasal rasul Paul ti deka ngereja pengawa iya ke ‘ngagai Masedonia.’