Kena 19 Julai 2021, Menyadi Arturo Manzanares, seiku ari Komiti Pampang Opis Amerika Tengah ngeluarka Bup Kudus Salin Dunya Baru Begian Sempekat Baru dalam bansa jaku Tojolabal.

Bansa jaku Tojolabal dikena lebih ari 66,000 iku orang asli, kelebih agi ba nengeri Chiapas di Mexico, tunga ke selatan ke semak enggau Guatemala. Salin Bup Kudus nya udah dikeluarka dalam fail bansa elektronik nengah program spesial ti dirikut lalu dipandangka terus ngagai kira-kira 2,800 iku orang.

Maya program nya, pencheramah nanya, “Nama kebuah kitai begunaka salin Bup Kudus dalam bansa jaku Tojolabal?” Ku iya nampung: “Laban nya amat beguna kena meri basa ngagai Pengarang Bup Kudus, iya nya Jehovah.”

Seiku menyadi indu ke gawa ba pengawa projek nyalin madah: “Ati aku ditegu lebuh macha John 5:28, 29. Aku ulih ngambarka indai aku diangkatka idup baru. Aku udah mayuh kali macha ayat nya ba bansa jaku Sepanyol, tang lebuh aku macha ayat nya ba bansa jaku diri empu aku ulih mereti agi. Terima kasih mayuh!”

Lebuh projek nya dipejalaika, tim nyalin dipindahka ari Pampang Opis Amerika Tengah ti semak enggau Bandar Mexico, ngagai Opis Penyalin ti baru di Las Margaritas, Chiapas. Opis nya diatu ba endur ke ngena bansa jaku Tojolabal enggau penyauh 990 kilometer (615 batu) ari pampang opis. Ke diatu, bisi semilan iku penyalin ke gawa penuh jam ba opis penyalin lalu bisi lima iku menyadi lelaki ke nyukung pengawa sida. Orang Tojolabal ulih mereti pangan diri taja pen datai ari endur ti bebida. Tang bisi sekeda leka jaku ti dikena sida nya enda sama. Bala penyalin enggau bejimat nyalin Bup Kudus Salin Dunya Baru Begian Sempekat Baru ngambika ulih dimeretika mayuh orang, tang pia mega mai reti ti betul.

Ngambika chunto, dalam salin Bup Kudus ke bukai, “Perintah Petara” disalin ngagai “endur alai Petara merintah” tauka “kampung (tauka bandar) Petara.” Tang, ngagai orang ke enda ngena jaku nya, ayat ke baka tu nadai entu bisi reti ba sida. Bup Kudus Salin Dunya Baru ba bansa jaku Tojolabal nyalin rambai jaku nya ngagai “Perintah Petara” lalu nya senang agi dimeretika.

Seiku menyadi indu ke enggau program nya madah: “Endang amat, Jehovah ngiring semua orang ke nyukung ba projek tu kena ngasilka salin ti terang, betul sereta senang dibacha. Aku andal pemeri tu ulih nyapai ati mayuh orang ke bedau agi ngelala Petara.”—Surat Kereja Rasul 17:27.