Kena 8 Ogos 2021, Menyadi José Nieto, seiku ari Komiti Pampang Opis Amerika Tengah ngeluarka Bup Kudus Salin Dunya Baru Begian Sempekat Baru dalam bansa jaku Mixtec (Guerrero). Salin Bup Kudus nya udah dikeluarka dalam fail bansa elektronik nengah program spesial ti dirikut lalu dipandangka terus ngagai kira-kira 785 iku orang. Pampang opis ngaga pelan deka berengkah nyelak Bup Kudus ba November 2021, lalu ngirum nya ngagai eklisia ba Disember 2021 tauka Januari 2022.

Lebuh Bup Kudus dikeluarka, pengudah macha 1 Korint 14:9, Menyadi Nieto madahka: “Jaku Petara amat bekuasa. Tang enti kitai ka jaku nya negu ati orang ke macha, Bup Kudus patut bisi ba bansa jaku ke dimeretika orang . . . , iya nya bansa jaku ke dikena orang ba ninting hari.”

Jaku Mixtec (Guerrero) nya ngena mayuh tiun bunyi ke ulih mai reti ti bebida. Bansa jaku nya dikena kira-kira 150,000 iku orang ba nengeri Guerrero, Mexico. Bisi mega penyampau orang ke enda ditemu ba begian bukai di Mexico enggau Amerika Serikat ti ngena bansa jaku tu.

Menyadi Lázaro González, seiku ari Komiti Pampang Opis Amerika Tengah madahka: “Endur alai orang ke Mixtec (Guerrero) diau nya seranta sereta enda likun. Tambah mega, pandemik COVID-19 ngasuh utai jai agi. Utai tu ngasuh mayuh orang pechaya Petara ninggalka sida. Tang, Jehovah nunjukka Iya ibuhka sida enggau meri sebegian ari Bup Kudus ba bansa jaku sida empu.”

Sebedau Bup Kudus tu dikeluarka, semina bisi dua iti salin Bup Kudus Sempekat Baru ba jaku Mixtec (Guerrero). Salin tu tusah deka dimeretika laban disalin orang ari dua iti komuniti ti bebida. Penyalin nya deka ngena jaku ke dikena ba endur sida empu. Utai tu ngasuh orang ari komuniti bukai tusah deka faham.

Siti chunto ke nunjukka salin baru tu senang dimereti, iya nya chara Matthew 5:9, NWT disalin, ti madah: “Gaga ati meh orang ke bekereja ke pemaik.” Dalam jaku Mixtec (Guerrero) nadai leka jaku ti nyemetak ke mai reti “pemaik.” Kena nyebut enggau chara ti betul, ayat tu disalin: “Gaga ati meh orang ke ngiga jalai kena mutarka penyarut.” Tu sejalai enggau reti ba jaku English.

Seiku penyalin nerangka: “Ayat Bup Kudus ke dikerinduka aku iya nya 1 Peter 1:25, ti ngajar kitai ‘Jaku Jehovah meruan belama iya.’ Aku enda ulih ngambarka diri idup enti nadai Bup Kudus, lalu aku beterima kasih ke Jehovah laban nentuka Bup Kudus agi bisi nyentukka diatu. Lalu diatu kami bisi ba bansa jaku kami empu, Mixtec (Guerrero).”

Penyalin ti bukai madahka: “Aku nadai kakang, Jehovah ke udah meri kami sukung nengah roh kudus Iya. Aku andal agi ari ke suba, Jehovah ulih nyapai ati semua orang enda ngira nama bansa jaku sida. Sekali agi, Iya nunjukka kitai, Jaku Iya ‘enda ditanchang.’”—2 Timoti 2:9.