Kena 25 Oktober 2019 nyadi hari ti besejarah ngagai bala menyadi ke ngena bansa jaku Maya. Ba hari tu, sida nerima Bup Kudus Salin Dunya Baru dalam bansa jaku Maya. Menyadi Esteban Bunn, seiku ari Komiti Pampang Opis Amerika Tengah meri jaku gerah pasal Bup Kudus tu, ba konvensyen pelilih menua ba Mérida, Yucatán, Mexico. Program tu diatur ba Palan Gempuru Besai Mérida, lalu dipandangka terus ngagai Poliforum Zamná, ke enda jauh ari pangan diri. Bup Kudus Salin Dunya Baru tu siti berekat ti besai ngagai semua penginjil ba endur nya, laban dalam urung 762,000 iku orang ngena bansa jaku Maya ba Mexico enggau Amerika Serikat.

Sebedau tu, semina Bup Kudus Gerika ke bisi dalam bansa jaku Maya. Bup Kudus nya dikeluarka kena 14 Disember 2012. Kenyau ari nya, litaricha nya udah dichelak nyauka 29,000 kali.

Seiku penyalin madahka, “Mayuh ari orang ke ngena bansa jaku Maya ngumbai Bup Kudus nya amat berega, lalu ajar dalam nya patut dititihka. Tang mayuh ari sida, enda tentu meretika leka jaku ti kelalu dalam. Nya kebuah, kami bebendar nyalin ngena jaku ninting hari, sereta leka jaku ti senang ditemu mayuh orang.”

Tim penyalin mega napi penyakal, laban bansa jaku Maya enda sama chara ngena ba sekeda endur. Nya kebuah, tajuk ke dipilih sida mega senang agi dimereti iya nya Biblia ich maya, reti iya, “Bup Kudus Maya.” Nambahka nya, ari 6,000 iti nota kaki dalam Bup Kudus tu, mayuh ari nya ngembuan salin bukai ke bisi ba ayat. Ketegal nya, macha ari orang ke macha ulih mereti, lalu nadai saru penemu nyadi.

Salin ke baru tu amat-amat “pemakai ba maya ti patut.” Tu tentu amat beguna kena bala menyadi kitai belajarka Bup Kudus kediri empu, sereta dikena sida nginjil ngagai orang ke ngena bansa jaku Maya.—Matthew 24:45.