Kena 25 Oktober 2019, Bup Kudus Salin Dunya Baru dalam bansa jaku Tzotzil dikeluarka ba konvensyen pelilih menua di Chiapas Mexico, ke diatur ba diwan Poliforum of Tuxtla Gutiérrez. Menyadi Armando Ochoa ari Pampang Opis Amerika Tengah, dipinta meri jaku gerah pasal Bup Kudus ke baru dikeluarka tu. Pengawa tu mega dipandangka terus ngagai Centro de Convenciones. Lalu penyampau semua orang ke datai bisi 3,747 iku.

Bup Kudus Gerika Salin Dunya Baru Dalam Bansa Jaku Tzotzil udah dikeluarka kena 26 Disember 2014, lalu disadung ngagai semua orang ke ngena bansa jaku nya. Mayuh ari sida diau ba atas gunung, tauka ba sebelah Chiapas Mexico. Peranak menua ba Mexico lebih ari 16,000,000 iku orang, lalu dalam urung 500,000 iku orang ngena bansa jaku Tzotzil, nyengkaum 2,814 iku Saksi-Saksi Jehovah.

Bala penyalin bansa jaku Tzotzil napi mayuh penanggul maya sida nyalin. Ngambika chunto, semina mimit aja litaricha tauka kamus ke bekaul enggau bansa jaku nya. Nambahka nya, bisi 7 bengkah bansa jaku Tzotzil ti enda sebaka nitihka ba sekeda endur. Nya kebuah, bala penyalin patut berunding enggau dalam maya sida milih leka jaku, ngambi jaku ke disalin sida ulih ditemu semua orang ke macha.

Seiku ari penyalin madahka, “Ketegal salin tu ngembuan nama Petara iya nya Jehovah, semua orang ke macha ulih semak agi ngagai Iya. Ba dua bengkah salin Bup Kudus ke bukai, nama Petara semina ayan ba nota kaki bup Pemansut. Tang salin dunya baru deka nyadi Bup Kudus keterubah dalam bansa jaku Tzotzil ke bisi nama Petara ba endur ti patut.” Seiku penginjil ke ngena bansa jaku Tzotzil mega madah, “Bup Kudus bansa jaku Tzotzil amat mar. Ukai mayuh orang tebelika nya. Tang, kitai bulih Bup Kudus tu enggau pechuma.”

Bup Kudus ke baru dikeluarka tu tentu meri mayuh penguntung ngagai semua orang ke ngena bansa jaku Tzotzil, ti “nemu diri begunaka Petara.”—Matthew 5:3.