Kena taun 2017, bisi dua iti tanah berenyang ti balat nyadi ba Guatemala enggau Mexico. Tulung diberi lalu tembu kena Disember 2018.

Keterubah iya, pampang opis ba Amerika Tengah ngatur beberapa iti gempuru kena meransang bala menyadi ke kena penusah tu. Gempuru tu diatur ba nengeri Chiapas, Morelos, Oaxaca, enggau Puebla, pia mega ba Mexico City. Bisi 39 iku Komiti Tulung Pengerusak Alam bekereja di baruh iring Komiti Pampang Opis ngatur pengawa nirika baru bengunan tauka rumah ke udah rusak.

Ba Mexico, lebih ari 42,000 iku penginjil ke datai ari 10 bengkah nengeri nyukung projek tu enggau sukarela. Bala menyadi Kristian nirika baru 619 iti rumah, 5 iti Palan Gempuru, sereta 2 iti Palan Gempuru Besai. Sida mega ngaduka 502 iti rumah sereta 53 iti Palan Gempuru ke bisi rusak. Ba Guatemala, bisi 10 iti rumah didirika baru.

Ruang bilik Hernández enggau ruang bilik Santiago entara menyadi ke nerima tulung tu.

Sida Hernández sebilik diau ba nengeri Chalco, iya nya 40 kilometer ari Mexico City. Tanah berenyang ke nyadi kena 19 September 2017, ngerusak rumah sida nyentukka enda ulih agi endur diau. Menyadi Ana María Hernández madahka: “Sekumbang ke udah kena penusah nya, kami nadai kala ngasaika diri kurang nama-nama utai. Bala menyadi Kristian nyaga kami enggau manah amat. Aku agi ingat maya rumah kami berengkah didirika baru, bisi kira 50 tauka lebih bala menyadi nulung nirika rumah kami. Nyentukka diatu, orang ke diau semak kami agi ngenang pemanah bala menyadi ngagai kami.” Kelimpah ari tulung nya, seiku pengari ari Pampang Opis ba Amerika Tengah ngabas sida Hernández sebilik lalu meri peransang nengah Bup Kudus.

Sida Santiago sebilik diau ba bandar Juchitán di nengeri Oaxaca. Tanah berenyang ba endur nya nyadi kena 7 September 2017. Rumah sida rusak abis. Taja pia, kurang ari enam bulan, bala menyadi ke nyadi sukarela udah nirika baru rumah ke sida. Menyadi Victor Santiago, ke nyadi tuai bilik madahka: “Aku amat alit ati enggau penyampat gerempung Jehovah nulung kami. Aku ulih meda Jehovah ba belakang semua utai tu.”

Menyadi Jesse Pérez, seiku ari Komiti Pampang Opis Amerika Tengah madahka: “Pengerusak ke nyadi ketegal dua iti tanah berenyang tu amat balat. Taja pia, projek ke diatur kena mantu ba penusah tu meri bala menyadi Kristian peluang nulung enggau sukarela. Mayuh bala menyadi datai nulung, lalu tu ngayanka pengerindu Kristian sida. Kami gaga ati Jehovah udah merekat pengawa “meri tulung” tu.—2 Korint 8:1-4.