Kena 15 enggau 16 Ogos 2020, Bup Kudus Salin Dunya Baru Jaku Gerika dikeluarka nengah pail bansa elektronik, dalam bansa jaku Changana enggau Macua ba Mozambique. Bisi lebih ari 8,000 iku penginjil ti ngena bansa jaku Changana, sereta lebih ari 1,700 iku penginjil ke ngena jaku Macua.

Menyadi David Amorim, seiku ari Komiti Pampang Opis Mozambique ngeluarka kedua-dua salin Bup Kudus tu nengah program video ke udah dulu dirikut. Program video nya terus dipandangka ngagai bala menyadi nengah online, ba TV, sereta lebih ari 30 iti stesen radio.

Jaku Changana kesuah agi dikena orang ba begian selatan Mozambique. Bisi kira-kira 1.9 juta iku orang ke ngena bansa jaku tu. Jaku Changana nyau sebaka enggau jaku Tsonga ti dikena orang ke diau ba Afrika Selatan.

Orang bansa Macua diau ba begian utara Mozambique. Kira-kira 5.8 juta iku orang ngena bansa jaku Macua. Ari semua bansa jaku orang asli Mozambique, jaku Macua meh ke pemadu mayuh dikena.

Sebedau tu, bala penginjil ke ngena kedua-dua bansa jaku tu tusah amat deka ngulihka siti Bup Kudus dalam bansa jaku sida empu. Bup Kudus nya mar, lalu kekadang, sekeda kedai ke nyual Bup Kudus enggai nyual ngagai Saksi-Saksi Jehovah. Seiku penyalin nerangka: “Aku kala ngabas eklisia ke ngembuan siti aja Bup Kudus. Bup Kudus nya disimpan ba Palan Gempuru, awakka iya ulih dikena pencheramah enggau sida ke bisi begian ba gempuru.”

Kitai sama bela gaga ati enggau bala menyadi kitai ke nerima Bup Kudus Jaku Gerika dalam jaku Changana enggau Macua. Awakka salin Bup Kudus tu deka nulung mayuh orang “nemu penemu pasal pemendar.”—1 Timoti 2:3, 4.