Kena 14 enggau 15 November 2020, fail elektronik bup injil Matthew dikeluarka dalam bansa jaku Gitonga sereta Ronga. Kedua-dua bansa jaku nya dikena orang ke diau ba utara Mozambique. Tu meh pemeri ari Jehovah ba maya ti ngena ngagai semua 524 iku penginjil ke ngena jaku Gitonga, sereta 1,911 iku penginjil ke ngena jaku Ronga.

Menyadi Amaro Teixeira ari Komiti Pampang Opis Mozambique ngeluarka dua-dua salin Bup Kudus tu dalam siti program ke dirikut lalu dipandangka terus nengah online. Kelimpah ari nya, menyadi kitai ba Mozambique nerima pemendar mandangka program nya ba stesen TV di serata menua Mozambique, sereta sekeda stesen radio ba endur bansa jaku nya dikena. Ketegal mayuh orang ke ngena bansa jaku tu nadai perengka elektronik, sida engka enda ulih download lalu macha bup Matthew. Nya kebuah iya mega deka dichelak dalam siti bup mit ke ngundan 64 lambar.

Menyadi Amaro nerangka: “Nadai mayuh Bup Kudus tauka litaricha Bup Kudus dalam jaku Gitonga enggau Ronga. Kami amat gaga ati bup Matthew udah disalin, laban nya meh bup ti madahka lis peturun Jesus, penerang pasal pengada iya, Ajar ba Atas Bukit, sereta jaku benabi ke disebut iya pasal hari ti penudi.”

Seiku penyalin nerangka pasal penguntung ari salin tu ti betul, terang sereta senang dibacha. Ku iya: “Bup Matthew penuh enggau ajar ti manah. Aku ulih ngambarka mayuh pemacha deka berasai amat beterima kasih lebuh sida macha Ajar ba Atas Bukit dalam bansa jaku sida empu. Asai aku sida engka nyabak, laban nya endang deka negu ati sida.”

Kira-kira 224,000 iku orang ngena jaku Gitonga, lalu pia mega kira-kira 423,000 iku orang ngena jaku Ronga. Arapka dua-dua salin Bup Kudus tu deka nulung mayuh orang tetemuka jalai ti “nuju ngagai pengidup.”—Matthew 7:14.