Kena 28 Februari 2021, Bup Kudus Salin Dunya Baru Jaku Gerika dikeluarka dalam bansa jaku Ndau. Enggau tu, Bup Kudus Salin Dunya Baru diatu ulih dibacha enggau penuh tauka sebegian dalam 200 iti bansa jaku. Nambahka nya, sehari sebedau nya kena 27 Februari, Bup Kudus—Bup Injil Matthew dikeluarka dalam bansa jaku Chuabo.

Menyadi Amaro Teixeira, seiku ari Komiti Pampang Opis Mozambique ngeluarka kedua-dua salin tu dalam fail bansa elektronik nengah program video ke dirikut dulu lalu dipandangka terus ngagai bala menyadi. Pia mega, program nya pan dipandangka ba stesen TV di serata menua, sereta nengah beberapa iti stesen radio. Bup Kudus—Bup Injil Matthew dalam jaku Chuabo mega deka dichelak dalam siti brosur ke ngundan 64 lambar, ke penguntung sida ke nadai perengka elektronik.

Ba Begian Zambezia, bisi 1.4 juta iku orang ke ngena jaku Chuabo, lalu bisi 492 iku penginjil ke nusui Berita Manah dalam bansa jaku nya.

Menyadi Nicholas Ahladis ke gawa ba Opis Penyaup Penyalin ba indu opis madah: “Pengawa nyalin bup Matthew dalam jaku Chuabo amat beguna. Sebedau tu, kengka salin dalam bansa jaku tu tusah diulih sereta mar dimeretika.”

Ba tengah menua Mozambique, kira-kira 1.1 juta iku orang, nyengkaum 1,500 iku penginjil, ngena jaku Ndau.

Sekumbang projek nyalin Bup Kudus tu dipejalaika, bisi tiga iti penusah besai ke ninggang sida bala penyalin. Kena taun 2019, Ribut Idai mangka lalu ngujungka mayuh pengerusak ba Mozambique. Kena taun 2020, baka ke diasaika ba tiap menua di serata dunya, Mozambique pan dituntung penusah penyakit COVID-19. Udah nya, ba pun taun 2021, Ribut Eloise mai mayuh agi pengerusak ba menua nya. Taja pan napi semua penusah tu, lima iku menyadi ke gawa ba projek tu ulih nembuka pengawa sida dalam dua taun setengah.

Seiku ari bala penyalin jaku Ndau nerangka: “Lebuh aku berundingka pasal utai ke ulih dikereja kami, taja pan napi mayuh penusah, aku tusah pechayaka semua pengawa tu ulih tembu. Ba aku, tu endang siti pengawa ajih. Kami nadai mayuh pengelandik, lalu kami napi mayuh penekul. Kami enda nyangka diri ulih nembuka pengawa tu, tang asil ari projek tu jauh manah agi ari ke disangka kami. Jehovah meh ke patut nerima puji.”

Menyadi Nicholas Ahladis nampung: “Bala menyadi kitai ke ngena jaku Ndau, nyengkaum sida ke nyadi penyalin, napi amat mayuh penanggul ke nangguhka projek tu. Tang diatu, salin Bup Kudus ke senang dibacha tu, baka siti upah ke bala menyadi kitai. Pia mega, iya deka ngelantangka ati sereta meransang mayuh orang Ndau ke amat begunaka peransang diatu.”

Menyadi Geoffrey Jackson, seiku ari Raban ti Ngiring madah: “Tiap kali Bup Kudus disalin ngagai sesiti bansa jaku, tentu bala penyalin bebendar nyerahka diri ba projek nya, sereta napi sekeda pemar. Lebuh ngenang baru semua penanggul ti ditapi tim penyalin jaku Ndau, nyengkaum ditinggang pengerusak alam, amat manah salin Bup Kudus Jaku Gerika ba bansa jaku sida ulih dikumbai Salin Dunya Baru ti ke-200. Nya amat spesial! Tentu salin tu deka nyadi siti berekat ngagai semua orang ke ngena jaku Ndau ba Mozambique.”

Kitai sama gaga ati enggau bala menyadi kitai ke udah nerima salin Bup Kudus baru. Endang ngalitka ati pengawa tu ulih tembu, taja pan kitai benung napi penusah COVID-19 di serata dunya. Endang nyata, nadai utai ulih nagang Jehovah ari ngemujurka semua pelan Iya.—Isaiah 43:13.