Kena 12 Januari 2019, bala menyadi Kristian kitai ba menua Nigeria ngatur siti gempuru ti spesial ba Palan Gempuru Besai Nengeri Benin di Nigeria. Lebuh program nya benung dipejalaika, Geoffrey Jackson, seiku ari Raban ti Ngiring, madahka pasal New World Translation of the Holy Scriptures ke udah diaduka baru, dikeluarka dalam jaku Isoko enggau Yoruba. Bisi 60,672 iku orang sama enggau ningaka program nya. Kelimpah ari ba Palan Gempuru Besai Nengeri Benin nya, bala menyadi Kristian kitai mega bisi sama enggau ningaka program nya ari 106 iti Palan Gempuru enggau 9 iti Palan Gempuru Besai ba Nigeria. Pia mega, bisi sekeda endur bukai ba Benin ke sama enggau ningaka program nya.

Menyadi Gad Edia ari pampang opis Nigeria madahka: “Bala menyadi Kristian kitai begunaka tiga taun dua bulan kena nembuka pengawa nyalin Bup Kudus ngagai jaku Isoko. Sida mega ngena tiga taun tiga bulan nembuka pengawa nyalin Bup Kudus ngagai jaku Yoruba.” Lalu ke pengujung iya, Menyadi Gad Edia madahka: “Ba menua Nigeria, lebih ari 5,000 iku Saksi-Saksi Jehovah ngena jaku Isoko lalu lebih ari 50,000 iku bala menyadi Kristian kitai macha tauka bejaku dalam jaku Yoruba. Seiku orang ke bisi dia lebuh bala menyadi Kristian kitai nerima Bup Kudus sida ti baru madahka, semua orang ke datai balat gaga ati. Nya alai, kami ulih enggau ati ti andal madahka, pengawa kami endang enda lebu ngapa!”

Nyentuk ke diatu, Saksi-Saksi Jehovah udah ngeluarka Bup Kudus New World Translation dalam 179 iti bansa jaku, enda ngira sebegian aja tauka semua sekali.

Kami beterima kasih laban diatu, bala menyadi Kristian kitai ulih macha sereta meretika Bup Kudus enggau senang agi ba bansa jaku sida empu.—2 Timothy 3:17.