Kena 16 Ogos 2019, ba hari keterubah konvensyen pelilih menua ke dipandangka terus ari Betel ba Capiatá Paraguay, Saksi-Saksi Jehovah ngeluarka Bup Kudus Salin Dunya Baru dalam bansa jaku Guarani. Bup Kudus tu dikeluarka menyadi Daniel González, seiku ari Komiti Pampang Opis Paraguay. Program tu mega dipandangka ngagai bala menyadi bukai ba 13 iti endur nengah streaming video. Nyadi, penyampau semua orang ke datai ngagai konvensyen tu bisi 5,631 iku orang.

Taja pan bansa jaku Sepanyol mayuh dikena ba Paraguay, tang bisi 90 peratus ari orang peranak menua tu ngena bansa jaku Guarani, iya nya bansa jaku asal sida empu. Sebagi ari rayat ba Paraguay aja meh nengeri ba Amerika Latin, ke ngena bansa jaku asal sida empu.

Seiku menyadi lelaki ke enggau pengawa nyalin Bup Kudus tu madahka, sebedau Bup Kudus tu disalin, mayuh ari bala menyadi besampi ngagai Jehovah ngena bansa jaku sida empu, iya nya bansa jaku Guarani. Iya nerangka, “Diatu Jehovah deka ngena bansa jaku Guarani bejaku enggau kami. Kami ngasaika Jehovah amat sayau sereta ngumbai kami berega ba mata Iya. Aku majak ngasaika Jehovah nya meh Apai aku.”

Tu terang nunjukka, Bup Kudus dalam bansa jaku Guarani amat beguna ngagai 4,934 iku penginjil ke ngena bansa jaku Guarani ba Paraguay. Sida tentu mansang semak ngagai Jehovah sereta beterima kasihka gerempung Iya. Kitai mega pechaya, orang ke macha Bup Kudus tu tentu bulih penguntung, iya nya penemu ti berega datai ari Petara.—Masmur 139:17.