Pengerintis seberai tasik ti keterubah dianjung ke Peru, lalu sida datai dia ba Oktober 1946. Sida nemu kandang endur sida nginjil nya besai. Pemesai endur nya 1.3 juta kilometer persegi (501,932 batu persegi) lalu bisi tujuh juta iku orang diau dia. Kenyau ari 75 taun ti udah, bala pengerintis seberai tasik enggau bala penginjil amat bagas nginjil, enda ngira ba endur ti bebukit tauka ba menua pesisir. Ketegal tu mayuh orang udah belajarka pemendar.

Beberapa taun sebedau bala pengerintis seberai tasik datai dia, Saksi-Saksi Jehovah ari Amerika Selatan beberapa kali datai ngelawa Lima, iya nya indu nengeri Peru, lalu ba dia sida meri litaricha ngagai orang ke bisi minat. Sekeda orang ke nerima litaricha nya berengkah nyembah Jehovah. Ba taun 1945, dua iku pengerintis seberai tasik ke bisi ba Chile datai ngagai Lima kena maptisa tiga iku orang ti keterubah ke nyadi Saksi-Saksi Jehovah ba menua nya.

Kenyau ari Oktober 1946 bala pengerintis seberai tasik ke graduet ari sekula Gilead, dianjung kia kena ngatur pengawa nginjil ba Peru. Sida ngatur gempuru ti keterubah enggau orang ke bisi minat ba Rimac di nengeri Lima. Nyau kelama, pengawa nginjil dipejalaika ukai semina ba nengeri Lima. Tu ketegal penyampau penginjil sereta pengerintis seberai tasik ba menua nya majak nambah. Pengawa nya majak nambah kemayaharitu.

Menyadi Nellena Pool, nyadi seiku ari pengerintis seberai tasik ti keterubah ke datai ba endur nya kena taun 1946. Iya bisi madahka pasal pengawa nginjil ti majak nambah ba Peru ba cherita pengidup ti dikeluarka ba majalah Menara Jaga, 1 Mac 1957. Menyadi Pool madahka Peru baka menua puang laban suba nadai mayuh Saksi ba dia. Tang nyau kelama majak mayuh orang nyadi Saksi lalu iya nyemaka tu baka bungai rose ti ngerembai.

Menyadi Irene Mannings, seiku graduet ari kelas ke-54 sekula Gilead ke agi ba Peru madahka: “Lebuh kami keterubah datai, semina bisi 7,000 iku bala penginjil. Tang diatu bisi lebih ari 130,000 iku penginjil. Tu siti basa ba aku ulih nulung mimit ba pemansang tu. Semua tu semina ulih nyadi ketegal berekat ari Jehovah.”

Semua 133,170 iku bala penginjil ke bisi ba Peru diatu amat beterima kasihka pengawa nginjil ke udah dipunka 75 taun ti udah. Sejarah Saksi-Saksi Jehovah ba Peru nunjukka semaya ba Isaiah 60:22 amat nyadi. Ku ayat nya madahka: ‘Indah suku raban bansa ti pemadu mit, ti pemadu baruh pendiau deh deka besai kuasa, baka bansa ti besai kuasa.’