Pampang opis Peru ngatur siti kimpin ti spesial, ngambi ulih bekunsika Berita Manah ari Bup Kudus ngagai orang Peru ke ngena bansa jaku Aymara. Pengawa tu berengkah ari 1 Mei nyentukka 31 Ogos 2019. Kimpin tu dipejalaika enggau mujur. Bisi 7,893 litaricha disadung, lalu 2,500 kali video dipandangka. Ba pengujung kimpin tu, bisi 381 iku orang berengkah belajarka Bup Kudus enggau bala menyadi kitai.

Ba Peru, dalam urung 450,000 iku orang ngena bansa jaku Aymara. Sekeda sida diau ba Puno. Ke diatu, bisi 331 iku penginjil ke ngena bansa jaku Aymara enggau kimpin tu. Sida begulai enggau tujuh iti eklisia sereta lapan raban di Peru. Ketegal endur ke deka dilawa tu amat besai, sida mega dibantu penginjil ke ngena bansa jaku Aymara ke datai ari Chile. Kekadang, maya deka nginjil ngagai orang ke ngena bansa jaku Aymara, bala menyadi kitai patut niki ngagai 5,000 meter, sereta napi gaya hari ti amat chelap.

Bisi siti raban patut ngena beberapa jam, nuju ngagai siti endur ke bisi mayuh orang datai enggau pengawa ngintu pemati. Bala menyadi kitai madahka semaya Petara pasal pengangkat ari pemati ngagai sida. Bala piak bekuasa ba endur nya, sereta diri sebilik ke ditinggang penusah nya amat beterima kasih ke bala menyadi kitai. Laban sanggup datai jauh, lalu meri jaku peransang ari Bup Kudus ngagai sida.

Ba endur bukai, bala menyadi kitai betemu enggau seraban orang ke begulai belajarka Bup Kudus dua kali seminggu. Sida ngena bup Tokoh Terbesar Sepanjang Masa dan Buku Cerita Alkitab, ke diulih sida ari seiku kaban belayan sida ke diau ba Bolivia. Pengudah sida nemu semua bup nya digaga gerempung kitai, mayuh ari sida berengkah belajarka Bup Kudus enggau bala menyadi sereta datai begempuru.

Menyadi Albert Condor, seiku ari tuai gempuru ke ngiring siti ari raban mega madahka, “Aku enggau bini aku amat gaga enggau kimpin tu. Pengarap kami ngagai Jehovah majak tegap. Maya belabuh, kami enda nemu baka ni tau datai ba endur nya, laban pejalai kin amat tusah. Maya datai din, kami besampi ngagai Jehovah ngambi bulih endur diau. Jehovah nyaut sampi kami. Sampi nya amat ngeringka aku, aku berasai diperansang maya aku meda menyadi bukai mega andalka Jehovah.”

Bala menyadi kitai berasai amat gaga maya sida meri “ai pengidup”, iya nya jaku Petara ari Bup Kudus ngagai orang ke ngena bansa jaku Aymara ba Puno, Peru.—Pemandang 22:17.