Begian selatan Luzon, enggau sekeda pulau ke semak iya

• Kena 25 Oktober 2020, Ribut Taufan Molave (ke dikumbai Quinta ba menua Pilipina) mangka Albay ba begian Bicol, di pulau Luzon, Pilipina. Ribut nya lalu mansang meraka pulau Luzon

• Kena 1 November 2020, Ribut Taufan Besai Goni (ke dikumbai Rolly ba Pilipina) mangka Catanduanes, iya nya siti da agi pulau ba begian Bicol di Luzon. Ribut nya, ke dikumbai kategori 5, lalu ngerusakka nengeri ke bukai, nyengkaum sekeda endur ke baru udah dipangka Ribut Taufan Molave

• Kedua-dua ribut taufan nya ngujungka ujan bangat sereta angin ti kuat, ke ngeninggika ai bah. Asil iya, mayuh orang nadai karan sereta enda chukup ai irup. Nyentukka diatu, nya agi amat tusah deka nerima berita ari endur nya, ketegal line talipun tauka internet putus

• Ketegal ujan bangat, tanah tusur nyadi ba sigi gunung beapi ke dikumbai Bukit Mayon, lalu mayuh rumah ba sebelah bukit nya abis diempa tanah luchak enggau lahar api nya

• Beratus iku penginjil dipindahka ari rumah sida

• Seiku menyadi indu ke beumur 89 taun mimit bakal lebuh iya ngerarika diri ari rumah iya. Pengudah nya, rumah iya rusak abis

• 134 buah rumah menyadi enggau 8 buah Palan Gempuru rusak mimit

• 75 buah rumah enggau 8 buah Palan Gempuru balat agi rusak

• 101 buah rumah enggau sebuah Palan Gempuru abis rusak

• Bala tuai ti ngabas enggau bala tuai gempuru ba endur nya benung bekerejasama enggau enam iti Komiti Tulung Pengerusak Alam, ngambika meri bantu ke diguna bala menyadi ba pemakai, ai irup, endur diau sereta sebarang utai bukai. Semua menyadi kitai ke enggau ba pengawa meri tulung sereta meransang, nitihka sekat ngambika nyaga diri ari penyakit COVID-19

Kitai terus besampika bala menyadi kitai ke balat ditinggang pengerusak alam tu. Kitai nemu ba maya ti tusah tu, Jehovah endang nyadi ‘Apai ti pun semua pengasih, Petara ti pun semua pengelantang’ ngagai bala menyadi kitai.—2 Korint 1:3.