Menyadi Cynthia Pablo beumur 64 taun. Iya seiku penginjil di Eklisia Jaku Bengal Bisu di Panghulo, Pilipina. Iya bengal, buta, lalu pia mega iya amat miskin. Iya diau enggau diri sebilik iya ke ukai Saksi Jehovah di Valenzuela City, alai mayuh amat orang diau. Cynthia sigi seruran napi mayuh pemar, lalu pengidup iya tusah agi pengelama penanggul COVID-19 tu. Tang bala menyadi ba eklisia iya nyaga iya enggau manah.

Ketegal umur iya ke udah tuai, Cynthia patut lebih agi bejaga ngambika enda dirampit COVID-19. Ketegal penusah penyakit tu, genturung pendiau alai Cynthia diau enda chukup ai. Sebedau penusah penyakit tu balat nyadi, bala menyadi indu ba eklisia iya nulung Cynthia bebasuka gari iya. Tang atur baru ari perintah enda ngasuh sida kin ngambika nulung iya.

Menyadi Walter Ilumin, seiku tuai gempuru ba eklisia iya, ngulihka siti surat ari perintah ti ngemendarka iya pansut ari rumah ngambika meri bantu ngagai Cynthia. Surat ti spesial tu semina diberi ngagai orang ke ngereja pengawa ti beguna bendar. Kelimpah ari masu gari ke iya, Walter mega mai pemakai enggau utai ti diguna sehari-hari ngagai Cynthia. Iya bejimat nitihka semua atur enggau iring ari perintah, nyengkaum ngena pemampul mua enggau perengka bukai ti nyaga ari ngerampitka virus, lalu pia mega iya suah masu jari.

Kena meri terima kasih ngagai bala menyadi, Cynthia suah ngerikut video pandak ti madahka asai ati iya. Menyadi Ilumin lalu bekunsika video nya enggau semua bala eklisia iya.

Menyadi Ilumin tu pan mansang ngagai rumah Cynthia kena nyalin tiap gempuru ke iya. Gempuru nya dipejalaika ngena video call. Menyadi Ilumin ngaga tanda jaku bengal bisu ngena jari iya, ke dipegai Cynthia, ngambika iya ngasaika lalu mereti. Ketegal tulung tu, Cynthia indah ulih meri komen enggau bejarit maya eklisia belajarka Menara Jaga. Laban Cynthia bebendar deka meri komen maya gempuru, nya pan udah merasang orang bukai ke meda program nya ngena video call.

Kitai nemu Jehovah endang gaga ati lebuh iya meda nembiak iya meri bantu sereta merindang ati pangan diri ‘lalu bebendar agi ngereja nya laban kitai meda Hari Jehovah nyau semak.’—Hebrew 10:24, 25.