Bala menyadi kitai ba sekeda begian Republik Congo enggau Republik Demokratik Congo ukai semina napi penusah ketegal coronavirus, tang pia mega, natka pemerinsa ketegal ampuh bah sereta perang. Pampang Opis Congo (Kinshasa) ke ngemataka pengawa nginjil ba kedua-dua menua nya, udah nyediaka bantu ba utai ke diguna sehari-hari sereta jaku peransang ari Bup Kudus. Pampang opis udah numbuhka 57 iti Komiti Tulung Pengerusak Alam (DRC) ba serata kandang pampang opis, ngambika nyediaka utai ke diguna bala menyadi. Naka ke diatu, lebih ari 90,000 iku menyadi kitai udah nerima pemakai ke diguna.

Kena 16 enggau 17 April 2020, ujan bangat ngujungka ampuh bah ba begian timur di Republik Demokratic Congo. Ketegal tu, 139 iku penginjil dipindahka. Diatu sida diasuh diau ba rumah bala menyadi bukai. DRC ke ditumbuh ba begian tu begigaka endur diau ke sida ke dipindahka, nemuka nya sementara aja tauka lama.

Bala menyadi udah bebendar nyukung pengawa DRC nya enggau gerah jari. Ba siti endur, bala penginjil ngumpul 700 kilogram (1,543 lb) buah pisang, 400 kilogram (882 lb) jagung, enggau 220 kilogram (485 lb) buah empasa sereta daun empasa.

Kelimpah ari nya, 60 iku penginjil di Eklisia Some 26 Km nyediaka endur diau ke 50 iku menyadi ke ngerarika diri ari endur ti balat ditinggang perang. Nyentukka DRC datai meri pemakai, sida bekunsika sebarang pemakai ke dikemisi enggau pangan diri.

Seiku tuai bilik ba Brazzaville, indu nengeri Republik Congo, ngenang utai ke diasaika iya maya nerima bantu: “Pengidup kitai ulih berubah dalam sekejap mata aja. Suba, entara gaji aku enggau duit mimit ke diulih bini aku, kami sebilik chukup duit kena beridup. Tang lebuh penusah COVID-19 ninggang, kami lenyau semua kereja. Tang kami enda lenyau pengandal ngagai Jehovah. Lebuh kami benung berandauka nama deka dikereja kami lebuh pemakai kami udah abis diempa, Jehovah ngereja utai kena nulung kami.”

Menyadi Mbuyi Ester nya seiku indu balu ba nengeri Kinshasa. Iya madah: “Aku lenyau laki aku dalam sebulan ti udah, aku balat amat begunaka tulung. Aku nadai gaji, tang aku patut nupi tiga iku anak. Endang amat, kami sebilik sigi enda ulih ngulihka pemakai ti chukup ke kami ngelamatu enti nadai nerima tulung. Terima kasih, Jehovah!”

Kitai besampika Jehovah terus nyaga bala menyadi kitai sereta ngemujurka pengawa meri bantu. Kitai mega enda sabar nganti maya jemah ila, semua orang deka idup senang lebuh bumi tu mansutka pemakai enggau lebat.—Masmur 72:16.