Bisi bengunan baru didirika ba Lubumbashi, Republik Demokratik Congo, ke deka nyadi bengunan utama pampang opis nya. Kira-kira 260 iku bala menyadi ke gawa ba Betel deka pindah ngagai bengunan baru tu urung bulan Mei 2022. Tang 131 iku bala menyadi ke bukai mengkang ba pampang opis lama ba Kinshasa. a Bisi siti da agi bengunan deka nyadi opis enggau endur diau ke belabuh didirika enda jauh ari pampang opis ke lama ba Kinshasa. Kira-kira 48 iku bala menyadi deka pindah ngagai bengunan baru tu pengudah bulan Januari 2024. Kedua-dua bengunan baru tu deka dikena nyukung pengawa nginjil ti majak mansang ba Congo.

Maya taun nginjil 2021, bala menyadi ba Republik Demokratik Congo ngajar lebih ari 250,000 iku pemelajar Bup Kudus. Lebih ari sejuta iku orang enggau pengawa Ngingatka Pemati Jesus. Diatu, bisi 394 iku bala menyadi gawa ba Pampang Opis Kinshasa.

Bengunan pampang opis ba Kinshasa tusah digaga besai agi, nya alai bala menyadi lelaki ngiga endur bukai ke bengunan baru. Sida tetemuka endur ti manah ba Lubumbashi alai sida ulih nirika bengunan baru lalu endur nya chukup kena nambahka bengunan bukai dudi hari.

Penyauh bengunan baru ba Lubumbashi nya 2,300 kilometer (1,429 batu) ari Kinshasa. Pemesai tanah nya 12 hektar (30 ikar) lalu bisi endur diau, opis, setor, dewan, enggau endur main.

Projek nirika bengunan berengkah ba bulan November 2020, tang bisi mayuh penekul ketegal pandemik COVID-19.

Menyadi Robert Elongo, seiku ari komiti pampang opis madah: “Sempadan menua ditutup. Nya alai, kami tusah nerima barang enggau perengka ti deka dikena kami. Nya ngasuh projek kami ditangguh.”

Taja pia, Menyadi Elongo madah, “Dalam setaun aja, kami udah meda 40 peratus ari fasa keterubah udah tembu digaga.”

Berekat Jehovah atas projek tu terang dipeda. Kitai besampi bengunan baru tu meri saksi ti manah ngagai orang ke diau ba menua nya lalu ngemuliaka nama Petara Jehovah.—Matthew 24:47.