Ribut sereta ampuh ti lama ke nyadi ba Republik Demokratik Congo, Afrika Tengah ngasuh endur nya majak balat. Pampang opis Saksi-Saksi Jehovah ba Congo Kinshana madahka, mayuh Saksi Jehovah nyadi mansa penusah ampuh bah tu. Kitai berasai amat tusah ati maya ninga berita, seiku menyadi lelaki kitai ke diau ba bandar besai Kinshana ditabanka penusah tu.

Sekeda riput ari pampang opis Congo Kinshana:

• Ba Kasai, mua ke barat daya menua tu, enam buah rumah ruang bilik Saksi, abis rusak ketegal ujan bangat sereta ribut ti kuat.

• Ba Sud-Ubangi, mua ke barat laut menua tu, siti Palan Gempuru tenggelam kena ampuh bah. Penyampau penginjil ke ngena Palan tu bisi 69 iku, ari tiga iti eklisia. Ampuh bah ke nyadi ba endur tu, udah ninggang 22 iti ruang bilik. Pampang opis udah ngasuh seiku pengerintis spesial, sereta seiku tuai gempuru meri bantu sereta meransang sida ke kena penusah tu.

• Ba Tshopo, bala menyadi ke diau semak sungai Congo patut dipindahka. Nambahkanya, abis nadai siti Palan Gempuru pan kena laban penusah ampuh tu.

• Beberapa iti eklisia ba Kinshana madahka, abis nadai bisi 80 iti ruang bilik kena penusah ampuh tu.

Ketegal ampuh bah tu, mayuh endur nyadi amat kamah lalu ulih ngenataika penyakit. Nya kebuah, pampang opis nyediaka penerang ngagai semua penginjil pasal chara nyaga pengerai diri.

Taja pan enda senang, tang bala menyadi agi betulungka pangan diri, lalu nyediaka utai ti diguna baka pemakai sereta gari. Komiti Tulung Pengerusak Alam mega meri bantu ti ngena, nitihka iring ari pampang opis.

Sepemanjai penusah tu, kitai amat andal, semua sampi sereta bantu ke diberi ari gerempung Jehovah, tentu “merindang semua orang” ke tusah ati.—Isaiah 61:1, 2.