Kena bulan Jun 2020, kampung Rodna ba Transylvania Romania, dipangka ujan bangat, lalu kena ampuh bah. Asil iya, enam buah rumah menyadi kitai rusak. Kena 27 Jun 2020, tuai ti ngabas ba Rodna seretai enggau bala tuai Ggmpuru dia, ngatur 25 iku menyadi ari eklisia ke semak, datai meri tulung ti patut diperumbanka. a Datuk bandar Rodna bisi meratika pengawa meri bantu tu, lalu muji bala menyadi kitai ba berita ke dipandangka di menua nya.

Kampung Rodna nya ba dalam siti lebak alai mayuh sungai rarat. Ketegal ai bah, mayuh jalai diempang tanah luchak sereta apat kayu ke dianyutka ai sungai ti besai. Ketegal nya, datuk bandar Rodna, enggau tim iya ke deka meri bantu, enda ulih tama ngagai siti endur ke ditinggang penusah. Tang, seiku menyadi indu kitai diau ba endur nya. Nyadi, bala menyadi datai lalu muai utai ke mempang jalai nya, ngambika ulih nulung meresi rumah menyadi indu tu. Tu mega nulung piak ti bekuasa ke deka datai meri bantu ngagai orang ke diau ba endur nya.

Udah nya, lebuh diinterbiu ba berita TV, Datuk Bandar nya muji pengawa bala menyadi. Ku iya: “Aku deka madahka siti utai ke nyadi, ti amat negu ati aku. . . . Ba hari ti keterubah, kami ngena lori ti besai sereta lipan kena muai tanah luchak sereta apat nya. Tang kami enda ulih nembuka nya laban pengerusak nya kelalu balat. Tang ba hari siti, kami ditulung . . . lebih ari 30 iku sukarela. Sida tu bala Saksi Jehovah. Ba ujung hari kedua nya, baru meh kami ulih nembuka pengawa tu. Sida tu meh ke mayuh nulung ngaduka sereta meresi endur nya. Aku meri besai terima kasih ngagai semua sida!”

Ba siti laman web, Datuk Bandar nya mega bisi ngepos siti pesan nuju ngagai bala menyadi kitai. Ku iya nulis: “Awakka Jehovah meri berekat ari atas, ngagai kita semua, lalu meri kita idup panjai, pengerai ti manah, sereta pemujur!”

Peneleba ke ari Romania tu, siti agi bukti pasal chara pemadas ulah kitai ulih mai mulia ngagai Apai kitai ti di serega, Jehovah.—1 Peter 2:12.