Kena 28 September 2021, nyadi ulang taun ke-75 konvensyen ti keterubah di Romania. Konvensyen nya diatur sepengudah Perang Dunya Kedua lalu maya nya mayuh bala menyadi kena perinsa. Taja pan mayuh orang deka ngetuka konvensyen nya, tang bala menyadi datai sereta gaga ati enggau program nya.

Konvensyen nya dipejalaika kena 28 enggau 29 September 1946 ba Roman Arenas di Bucharest. Bala menyadi ba Romania nyiwa sebuah kerita api ngambika sida ulih ngambi bala menyadi kena datai ke konvensyen nya. Taja pia, bala tuai pengarap Orthodox ngasuh kerita api nya ngetu ba beberapa iti endur kena ngelubahka pejalai sida.

Kena Hari Lima pukul 9 pagi, bala menyadi ari endur nya udah nganti ba stesen kerita api kena ngelaluka bala menyadi datai ke konvensyen nya, laban kerita api patut sangkai kena pukul 10 pagi. Taja pan kerita api nya laun datai, tang sida enda asa ati lalu enggau sabar sida nganti nyentukka pukul 6 lemai.

Ketegal perang, mayuh rumah udah rusak. Nyadi semina beberapa iti aja endur bala menyadi ulih bemalam. Ngambika siti chunto, bala menyadi meli lalu nganchauka rumput ti rangkai ba depan rumah seiku menyadi ke semak ba konvensyen nya. Ketegal maya nya musin angat, beberapa iti ruang bilik ulih tinduk enggau jenak taja pan nadai perabung.

Bisi kira-kira 3,400 iku orang ke datai ngagai program pagi Hari Enam. Orang ke datai nemu Menara Jaga deka berengkah dikeluarka baru dua kali sebulan dalam bansa jaku Romania enggau Hungary. Ba konvensyen nya, bala menyadi lelaki nyadung kira-kira 1,000 iti Menara Jaga edisi keterubah ngagai orang ke datai. Dalam siti timpuh, majalah nya ngundan artikel dipelajar tambah, ngambika bala menyadi ulih belajarka artikel ti enda diterima sida maya perang.

Ba hari minggu, penyampau orang ke datai majak nambah, nyentukka bisi 15,000 iku orang ke ningaka cheramah umum. Bala pegawai perintah Romania, polis enggau tuai pengarap Orthodox ke ngena gari sembiang, mega datai. Bala menyadi udah nya nemu, bala tuai pengarap udah ngatur beberapa iti tong minyak kerita diengkah semak enggau endur alai konvensyen dipejalaika. Tuju sida nya deka ngasuh letupan nyadi lebuh maya program nya. Taja pia, bala menyadi enggau polis ulih ngetuka pelan nya.

Lebuh maya program nya, seiku ari bala tuai pengarap nguji deka niki ke pentas. Tang bala menyadi lelaki nagang iya. Ku seiku menyadi ngagai tuai pengarap nya: “Kami enda begunaka tuai pengarap Orthodox bejaku ba konvensyen tu. Tang nuan ulih duduk enggau ninga.” Tuai pengarap nya pan enda agi nguji ngachau program nya. Pengudah nya, ketuai peguam menua Romania muji bala menyadi ke ngatur konvensyen nya enggau amat teratur.

Menyadi Vasile Sabadâş, ke diatu beumur 96 taun, ke bisi datai ngagai konvensyen nya nerangka, taja pan disakal, bala menyadi enda takut. Ku iya madah: “Aku langsung enda ingat kala ngasaika indah mimit pan takut. Asai takut nya ukai penanggul ba kami. Bala menyadi udah suah disakal. Sida langsung enda takut.”

Vasile mega nerangka, konvensyen nya udah nulung ngeringka penyerakup bala menyadi ba Romania. Mayuh orang udah belajarka Bup Kudus sereta dibaptisa lebuh perang nyadi. Ketegal baru ba pemendar, sekeda ari sida bebagi ketegal enda sepenemu pasal perang. Tang Vasile madah, pengudah konvensyen nya, “bala menyadi beserakup sereta gaga ati.” Ku iya nambah: “Aku enggai konvensyen nya abis. Amat tusah deka meri selamat tinggal ngagai semua bala menyadi.”

Kemayaharitu, bala menyadi kitai ba Romania ulih ngereja pengawa sembah sida enggau enda ditagang. Ba taun 2020, lebih ari 39,000 iku Saksi-Saksi Jehovah ba menua nya. Lalu ba taun 2021 bisi lebih ari 100,000 iku orang ke datai Ngingatka Pemati Jesus. Tu rikut ti baru ba Romania.

Pengeran bala menyadi ba Romania ke deka mutarka semua penanggul ngambika ulih begulai enggau pangan diri patut dipuji. Kitai amat beterima kasih ngagai berekat Jehovah laban ngelindung nembiak Iya ba pengawa ti penting nya.—Hebrew 10:24, 25.